【平民投資教室】錢俊：熱浪侵襲有冇投資受惠?
平民投資教室
日期：2022-07-26
更新時間：09:01:38
英國及歐洲錄得連續幾日破紀錄三十幾度高溫。至於香港,天文台預報可見未來一周都係酷熱。全球北半球多地罕有咁面對持續熱浪影響,引起大家再討論全球暖化問題。
減低溫室氣體排放
係全球各國應對氣候變化嘅政策之一。特別係歐洲,本身當地民眾對環境議題已經比其他地區嚴重,今次熱浪加埋俄羅斯對中斷石化燃料嘅威脅,進一步加速ESG發展。
錢俊上年尾都輕輕提過用碳排放權(Carbon Credit)交易,管控溫室氣體排放。簡單嚟講,係當地政府要求唔同公司通過採取一系列行動同措施嚟減低自己嘅碳排放,做得好就會俾所謂「碳排放權」嘅「印花」佢哋,而唔達標嘅公司,就要向達標公司俾錢買印花嚟滿足法例要求。政府咁樣用威迫利誘嘅方法,利用市場經濟實現政府嘅減排目標。
歐盟係實施碳排放權最大嘅實體。根據資料,2021年歐洲碳排放配額成交額為6,830億歐元,約佔全球碳排放成交額90%。2020年底有關制度亦令歐洲溫室氣體排放量從1990年的水平下降約31%。
由於好多公司唔達標要買印花,所以呢類碳排放權係有價有市。2020年疫情後好多工業活動恢復,碳排放需求更加有增無減。去年相關期貨及指數愈升愈有。之前錢俊介紹過KraneShares Global Carbon Strategy ETF(US: KRBN),除咗係市面最大嘅碳排放權相關ETF,上年仲係美國上市ETF表現三甲之一。
3060:香港第一隻碳排放權ETF
至於香港,中國第一大投資銀行中國國際金融(中金)旗下香港子公司喺今年三月推出中金碳期貨ETF(HK: 3060),成為大中華市場首隻碳相關ETF。基金追蹤ICE EUA碳期貨指數嘅期貨合約。每份EUA允許持有人排放一公噸二氧化碳當量的溫室氣體。有咗呢隻ETF,投資者依家就可喺亞太時區參與碳市場投資,唔一定要等到夜晚美股開市先買到,帶嚟一個方便性。
然而,需要注意基金以投資期貨為所有持倉。正如早前錢俊所述,期貨ETF較難長揸。首先,管理費唔少,每年約1%。其次,投資嘅期貨係有到期日,ETF要喺期貨將近到期前賣出近期嘅持倉,轉買遠期嘅期貨以維持運作,除咗交易費用,一般遠期都比近期期貨價格貴,出現所謂「正價差」(contango),一買一賣需要補錢,自然不利回報。加上投資期貨無息派,跌市坐貨就會雙重打擊。
睇返表現,3060對上三個月跌12 %,似唔乎唔多開胃。但上市至今不到半年只係蝕7%,如果拎其他資產類別包括股債及加密貨幣嚟比較,3060算有一定抗跌能力。呢個都係因為一般投資資產升跌與碳排放權價格關聯度相當低,叫做避過咗加息通脹嘅跌市憂慮。
想聽其他投資Topic?話我知:chinjun.column@gmail.com
FB: chinjun.etf
IG: chinjun.column
以上觀點僅為個人分析,並不構成任何投資建議。
平民投資教室 - 錢俊 舊文
本文作轉載及備份之用 來源 source: http://hksmedia.com
