【平民投資教室】錢俊：中資科技公司分拆上市成常態
平民投資教室
日期：2023-04-04
更新時間：09:31:59
短短兩個星期，市場對銀行風暴已經淡忘，港美股市都突破月初水平重新出發。而港股更加強勢，阿里巴巴重組顯然係趨化劑。
公司重組分拆時有發生，分析師多分拆能「釋放價值」。一
啲有多個業務嘅公司，業績報告未必好詳盡出列出細分業務盤數同前景，分析師喺估值時搵唔齊數據可能會估低咗。分拆就令條數更清晰之餘，又可以透過再上市集資攞到錢，一舉多得。然而唔係間間公司想分拆。比如散戶愛股匯控，經常有投資者炒作公司分拆亞太區業務上市，管理層次次都落閘say no。
錢俊唔係炒股分析師，唔敢分析分拆係咪利多於弊，加上市場大把相關分析。反而最大因素，係中央對阿里甚至互聯網業嘅收緊態度或已經轉向。
互聯網業監管風暴大概由2021年馬雲公開場合對金融法規嘅意見開始，之後螞蟻金服上市觸礁，到數據安全問題等等。其中一個考慮，或者係對互聯網寡頭成長到呼風喚雨嘅階段，因此要有政策出台「撥亂反正」。互聯網公司分拆後，公司將由中央集權，變為多個分封諸侯，或削弱某啲創辦人嘅權力。之前亦有關於政府要有「黃金股權」嘅風聲，令公司要喺方向上都跟國家走。
有趣嘅係，新聞由突然報道馬雲將唔返內地，不久又話已經返咗去，之後就宣佈重組消息，明顯係經過精心計劃。呢啲風聲或者都係早前錢俊認為係政策轉向嘅訊號。呢類民企科技巨頭分拆上市嘅消息或者在未來幾年成為常態。
2835：香港新股都有ETF
講開分拆上市，香港散戶愛抽IPO。香港竟然都有一隻以此為主題嘅ETF。
輝立香港新股指數ETF（HKG:2835）旨在追蹤近期首次公開募股或轉到聯交所主板嘅證券表現。成份股有50隻，管理費為0.6%。
錢俊一向唔建議抽IPO，因為回報差過賭大細。上季港股有17隻IPO，至上周已有9隻跌穿招股價，只有4隻升超過20%。有一隻當時獲超額認購11倍，結果當日仍大跌44%，至今已跌超過60%。正一賺粒糖蝕間廠。
但2835雖冠名「新股」ETF，其實有取巧成份。股票除咗要有一定市值同交易量外，可以喺過去756個工作日內上市，減埋假期即係差不多三年內上市都乎合資格。因此十大持股已包括百度、網易、京東、快手等，結果就係表現都跟科技巨頭走，今年至今升4.6%。假以時日當呢啲巨頭過咗三年被剔出成份股，換入較小型或低增長行業嘅公司，基金能否仍有表現成為疑問。
想聽其他投資Topic？話我知：chinjun.column@gmail.com
FB: chinjun.etf
IG: chinjun.column
以上觀點僅為個人分析，並不構成任何投資建議。
平民投資教室 - 錢俊 舊文
本文作轉載及備份之用 來源 source: http://hksmedia.com
