市場傳聞指，港股要加快在惡劣天氣下要維持開市。
9月份港股兩度受惡劣天氣影響而要停市，相信大家都感受到，這兩次的天氣的確幾壞，如最終真的要攀山涉水地返工，係非常麻煩，在惡劣天氣下外出上班，靠的只能是公共交通，又或者出來博命嘅「的哥」，如遇上9月那次的黑雨，周街都係水，屋企又唔近港鐵站，亦
call唔到的士，想返工都返唔到，今次港府的安排尚算可以，一早講明惡劣天氣維持到下午，等大家可安坐家中。不過幾個星期後的今天，又傳出港股要加快在惡劣天氣下要維持開市，究竟高官們個腦係諗乜嘅呢。
美股外幣即時報價 多國新聞任睇
結算日遇惡劣天氣影響大
若從專業的角度去看，交易市場愈多這些幹擾事件而停市，的確係幾煩的。作為投資者，少一個交易日無太大問題，最多就瞓多陣，炒少一日，但作為一個國際金融中心，要持續交易及交收是有其必要性。舉個簡單的例子，9月8日黑雨，當天沒有任何交易及交收，如9月6日的交易就要順延至下一個交易日，9月11日去交收。
驟眼看好像好小事，但各大小券商及銀行的中後線部門，有機會因系統忽然多了一天的假期，要做人手調整，叻嘅系統就識行多幾步，減少人手調整的工序，蠢嘅就人手走多幾步囉。如果期指結算日遇上颱風及黑雨，牽連的影響就更大，當然這些在港交所的規則一早寫明點樣做，但都係嗰句，如果個系統係差啲，就好多人手調整要做，所以相信負責落手做的從業員，其實好希望唔好全日停市，起碼工作量會減輕啲。
如果期指結算日遇上颱風及黑雨，牽連的影響就更大。
券商WFH模式待考驗
如在惡劣天氣下繼續交易，當然可以解決以上的交收麻煩，但前設就是，我們是否可以全面啟動WFH模式去處理交收。經過了幾年的疫情，很多券商及銀行已可全面WFH，但要留意的是，要達成繼續交易，不單是大部分券商及銀行能做到，而是全部，以現時交易咁慘淡之際，要中小型券商全面實行WFH模式，是否咁易做得到呢，額外的成本港交所（0388.HK）是否有援助呢？
今個星期無北水，港股成交有兩日低於600億元，星期四更低見470億元，是自2019年平安夜半日市後的最低水平。券商叫苦連天，每天的收入都未必夠畀燈油火蠟，日後在惡劣天氣下繼續交易，如果都係得四、五百億成交，除了港交所可以大聲講「跟其他國際金融中心」睇齊，其實又有甚麼大作用呢？大費周章去優化呢樣，不如減印花稅刺激嚇交投好過啦。
青冰
本欄逢周五刊出
大茶飯 - 青冰 舊文
本文作轉載及備份之用 來源 source: http://hk.finance.yahoo.com
