大師冇點你│跟股神買貨的盲點（李聲揚）
大師冇點你│跟股神買貨的盲點（李聲揚）
二季買入咗500萬股聯合健康。 · jetcityimage via Getty Images
新鮮滾熱辣，股神畢菲特（其實係巴郡，留意兩者都真係有些少分別）提交倉位變動，原來第二季買入咗500萬股聯合健康（United Health）。300美金一股，就大約15億美金——消息一出，UNH上星期五就升13%。
美股外幣即時報價 多國新聞任睇
利申一下：本人都有買，高追都在所不惜。反正我買股票預至少升一個開，甚至幾個開。高追10%，都唔係極大問題。
不過唔好以為我係「因為」畢菲特買先至買。都真係要講，留意咗隻嘢好耐，而早排真係諗住買，但只係停留在「諗」嘅層面。到上星期，就天時地利人和。首先係沽咗一半嘅Palantir（PLTR），有返啲現金。第二就係巴郡嘅消息，我原本都想買，咁佢都買，就更加唔怕。
我亦唔怕買貴10%。當然，巴郡係第二季買呢隻嘢，當時再平啲，所以我應該唔止買貴10%。不過，最低位到而家都只係升咗30%，咁買貴30%我都唔介意嘅。
不過，如果你係為咗想「跟」股神，而買呢隻嘢，就可能會有啲表錯情。
呢個亦係好多人常犯嘅錯誤。如果你想「跟」一個人嘅表現，咁你當然係要跟曬——唔止跟新trade，仲要跟existing position。
唔明講乜？咁話你知，就算UNH爆煲，對巴郡都近乎冇影響。15億美金都冇影響？係！點解？因為巴郡就真係好大。
你可以睇返，UNH嘅呢部份，只係佔巴郡總倉位大約0.5%。計排名，應該係巴郡第20大持股咁上下。0.5%，真係爆咗煲都唔大影響。所以唔好到時UNH唔生性，但你見到巴郡掂，你就覺得人地呃你。
類似嘅情況，我都試過。早兩年巴郡買咗 Ally Financials（ALLY），我都照跟。隻嘢冇爆煲，但五年間冇乜點鬱。不過巴郡依然勁。點解？因為ALLY，亦只係佔佢大約0.4%倉位（雖然都過10億美金）
記住，要跟就跟埋Existing position，唔好只係跟新Trade，因為新Trade佔人地倉位好少。
話說回頭，巴郡嘅Existing position 係乜？向來都公開，亦冇乜點變。五大持股，就係蘋果（APPL），美國運通（AXP），美銀（BAC），可口可樂（KO）同埋雪佛龍（CVX）。呢五大持股，佔咗巴郡60%以上嘅倉位。
問題嚟啦喎：點解近年蘋果同可口可樂，股價表現麻麻地。但巴郡仲可以一路跑贏？畀你返去思考下。提示：巴郡「跑贏」，其實係乜意思？
無論如何，買UNH可以，我都買咗。但我就唔建議大家而家呢啲位買巴郡股票（Berkshire Hathaway，BRK）了。原因？有機會再講。
李聲揚
前大行分析員，如今無業遊民，別人恐懼時我貪婪
FB Page︰meatbonetea金融肉骨茶
本欄逢周一刊出
大師冇點你 - 李聲揚 舊文
本文作轉載及備份之用 來源 source: http://hk.finance.yahoo.com
