大師冇點你│新世界注資傳聞的解讀（李聲揚）
大師冇點你│新世界注資傳聞的解讀（李聲揚）
新世界（017）嘅花生，食極都停不了。最新傳言，係大股東鄭家純
家族，考慮注資100億港紙。雖然公司否認咗，話「未收到」——咁但，收到之前，就當然係未收到。事實公司之前亦都傳過私有化。
美股外幣即時報價 多國新聞任睇
注資100億咁少
我聽到「100億注資」嘅傳聞，第一個反應係：咁少？
首先搞清楚，股東注資就還注資，負債就還負債，是兩回事，唔識就返去讀會計101。所以，有人話新世界負債成1500億，注100億雞碎咁多，講法唔多合適。
因為再講一次：會計101，資產（Assets）＝ 負債（Liabilities）＋股東資金（Equity）。一間公司嘅資產，一係嚟自自己友（股東資金），一係嚟自街外（負債）。而股東資金，同埋負債，係兩回事。
問題係，新世界雖然好似不停爆鑊，不停輸錢——但股東資金都仲有1700億。注100億入去，實情並唔係咩好大嘅數目，對成件事嘅幫助，好似不大。
另一個更難搞嘅問題，係新世界雖然低位升返75%，但而家只有170億市值。換個講法，市帳率低得緊要。大股東已經坐住45%，如果再注100億落去，咁用乜價錢？換幾多股權？其他股東如果畀人大攤薄，又會點諗？如果搞供股，大家又點反應？呢啲都係相當複雜嘅問題。既然係咁，會唔會私有化咗佢，仲簡單？
出面有個講法，話大股東一直置身事外，唔係太好。銀行同其他相關人士，點都想大股東要「上身」，孭返部份責任。係定唔係，都真係觀點與角度。嚴格嚟講，有限公司嘅嘢，似乎冇人可以迫到大股東做任何嘢。係要唔注資嘅，真係奈佢唔何。難道銀行會清佢盤？
不過實際上，又未必咁簡單。大股東有頭有面，亦都有大把其他投資，又未必會咁樣擺爛。可能幾方不同勢力，就在背後角力。無論如何，大前題係，大家點都想大股東出返啲錢，點形式就慢慢研究。
而事實上，大股東拎100億出嚟，應該綽綽有餘。出面啲小朋友，以為新世界跌咗好多，大股東就好唔掂。但都唔好話咩「大股東自己收埋幾千億又話你知咩」之類嘅都市傳說。只係睇一啲比較可靠嘅估計，都會發現，大股東拎100億出嚟，濕濕碎啦。所以，報導嘅銀碼，會唔會太細？
Bloomberg估計 大股東身家達2200億港紙
如果你睇福布斯2025報告，就估大股東身家大約200億——美金呀下，即係1600億港紙左右。固然呢啲數可能「唔準」，但總比網友亂咁估好啲。
詳細少少嘅，Bloomberg會有深入啲嘅估算，一般更加可靠。 Bloomberg估計，大股東身家應該有280億美金，2200億港紙。拎100億出嚟？濕碎，零頭嚟咋。
有人奇怪，點解新世界跌咁多，大股東仲咁富貴。睇返Bloomberg拆解：大股東嘅280億美金身家，大約130億係周大福股票（1929.HK），23億係周大福創建股票（0659.HK）——呢啲有曬市價，好透明。另外，相信大股東現水都有110億。呢度三樣加埋，都263億。至於新世界嘅股票，跌得太多，而家只係人地身家嘅零頭。
亦都留意返，新世界今年股價升咗40%，跑贏港股（同美股）。如果今年低位計起，就係4蚊升到7蚊，升足75%——當然，要有無比勇氣，先做到呢啲咁高難度嘅動作。本人早兩年都短炒過一轉新世界，結果都有微利，走得快好世界，如果坐到而家，應該都要輸錢。
照計嚟緊，新世界仲會有唔少大動作。大家就可以諗下在側邊食花生，定係落場玩埋一份。
李聲揚
前大行分析員，如今無業遊民，別人恐懼時我貪婪
FB Page︰meatbonetea金融肉骨茶
大師冇點你 - 李聲揚 舊文
本文作轉載及備份之用 來源 source: http://hk.finance.yahoo.com
