金融High Tea——見乜炒乜市
2013年1月15日
昨日係內地A股大發神威的股市。上證綜指開盤之初仲係呆呆哋，到早上10點半後就開始發力，過關斬將，連續突破10日、5日線，一舉突破2300點，大升超過3%至2311點，厲害嘅係成交大得驚人，上海深圳兩市成交2431億人仔。
內地券商食到應
內地股市全面爆升，罕有地所有板塊全面大漲，當中以飛機製造股升得最多，整體漲幅達8.7%，理由係中日關係緊張，好有擦槍走火味道。
A股咁升法，港股無理由甩拖，不過升幅相對較弱，恒指到中午前上到23450點已經無乜力水，午後內地股市在兩點幾衝上新高位，但港股升幅跟唔上，恒指收市仍漲149點，收升幅只有0.6%；國企指數大幅跑贏恒指，收市大漲161點至12000點上方，收報12004點。大市成交遜色，較上日縮減至775億元。
內地A股大漲的主因，是受惠中國證監會主席郭樹清昨日在香港出席亞洲金融論壇時發表的講話，佢提到擴大進出中國股票投資的資金水喉，話考慮適時推行第二階段的QFII(合格資境外投資者機制，即容許外地資金進內地買中國股票)和QDII(合資格境內投資者機制，即容許中國資金出外買外地股票)。現在只容許中資機構透過QFII機制買內地A股，將來可以容許包括港資在內的外資參與QFII，現在QFII總量只佔內地股市的1.5至1.6%投資，郭樹清話可以擴大9至10倍。容許加大外地流入內地股市的水喉，對A股自然有利。郭樹清同時提到容許內地資金外出投資(包括港股)的QDII機制，佢話在適當時機會推動第二期QDII，呢一味就對港股有利。
中環茶友話，內地和香港都係好市底，對好消息特別有反應，可以話係「見乜炒乜」的股市，阿爺話加大QFII和QDII，理論上對內地證券股最有利，隻中小型證券股第一上海(227)，昨日就大升21％。現在阿爺逐個行業出啲政策，一講到一個行業，就可以大炒一番。
中航科工炒味升
講開「見乜炒乜」，有時都係一觸即發，昨日香港炒證券股勁啲，但內地就炒航空軍工製造股，相關股票如洪都航空、西飛國際的A股在內地都升10％或以上。佢哋炒起同中日有關釣魚島的爭議有關，內地市場熱議中國海監飛機和日本F-15戰機在釣魚島附近飛來飛去，加上日本新首相還擺出強硬姿態，中日擦槍走火的可能性大增，令軍工股投資機會再次來臨。
炒軍工股唔係太無厘頭，因為開戰可能性上升時，唔使真打，中國都會加強軍備製造，對軍工製造股的生意有實質利益，而香港差不多唯一一隻軍工股就係中航科工(2357)，在內地爆升的洪都航空和西飛國際都係佢子公司，中航科工自己就直接生產作戰用的直升機，佢昨日亦大升7％至3.72元。
中航科工唔算好炒得的股份，好少如昨日那樣一日爆升6％的日子，但佢勝在穩步向上，去年7月見咗2.25元低位後，好似矮仔上樓梯咁樣，一級級爬番上來，非常穩定，呢隻嘢長遠要發展成中國的波音公司，但記住「長遠」兩個字，以去年計估佢業績仲未得，在市旺時會炒上，但業績支持力未足，市差時會回，但如今有打仗概念，有機會挑戰番去年2月高位4.35元，可以留意，不過只宜回吐時低吸。
陸羽仁
上一頁 下一頁
金融High Tea 舊文
