金融High Tea——順勢
2013年4月15日
上周五黃金、白銀等商品價格大跌，期金一度跌至每安士1480美元的低位，大家唔好忘記，佢上周四仲係收報1564美元，即係1日內最多跌咗84美元，大插5.4%。借孖展炒金，補唔到倉一日就俾人殺頭。2011年8月期金曾見每盎司1891.7美元收市高位，現在金價較高位已回落超過20%，技術上，跌幅超過20%就已經步入熊市。
上周五唔止黃金受壓，白銀亦急插，其他商品亦無運行，原油價格亦急滑，紐約期油價曾下挫3美元以上，低見每桶90.27美元，跌幅3.5%，收市反彈至跌2.2%，雖然無黃金跌咁勁，但都相當驚嚇。
如果問跌乜，黃金跌有人會答美國經濟復甦利好美元，利淡黃金；石油跌又會話美國上月零售額意外錄得9個月來最大跌幅，令人覺得美國經濟未掂，總之啲「解釋」頭尾唔夾，所以我唔覺得係真正原因。
為求易炒 資金轉向
我估真正的推動力係大錢轉移，資金向容易賺錢的方向流動。美股日日創新高，日股又向上，買日股沽番日圓對沖暫時係最易賺錢的法門，好似高盛就話看好日股，預計仲有20%空間向上。既然買美股、日股咁易賺，我上次都講過，資金乾坤大挪移，移向易賺錢之地。以歷史水平計，黃金也好，石油也好，都還在相對高位之上，唔沽佢地沽乜嘢？
有個老友炒開金，上周六面青青咁問我黃金幾時升番上去，佢既問題傾向係仲睇好黃金，問跌幾多會回升。從佢既神色話畀我聽，佢可能揸咗金，扮咗蟹，希望金價回升脫身。從老友的提問，又睇到一個散戶毛病：「活在回憶中」。佢過去應該買過金賺過錢，所以依家亦只係問幾時會升，唔係中立啲咁問，究竟金價未來升定跌？
黃金咁大隻商品，可以睇基本供求因素，亦可以睇走勢。若講基本因素，即係比較緊美元美股相對黃金的投資價值，如果美國經濟只係好似2011年頭咁，以為經濟在復甦，點知食詐胡，股市升完會有較深回吐，美元亦難全面走強，咁黃金亦無大礙；萬一美國經濟今次真係食胡而唔係詐胡，咁美元會反覆向上，黃金就會中長線一直往下走。暫時未睇得通，但美國經濟動力未係好強，不排除係詐胡。
短有反彈 中線看淡
若講黃金走勢，可分為短中長期走勢。先講短期走勢，黃金大跌跌到出新聞，跌到陸羽仁都寫下，自然係跌得好厲害，一日最多跌84美元，除了跌幅大之外，亦因為跌穿了1500美元這個大位，觸發大量止蝕盤入市斬好倉，才會一試就下試到1480美元。但話番轉頭，既然觸發咁大量止蝕盤的跌幅已反映，要沽的人都沽了，短期走勢企穩後可能會彈一彈。散戶都有此經驗，過去唔習慣止蝕，但開始止蝕後，卻往往發現一止蝕後好易反彈，造成一止蝕即錯的印象，皆因好多人都定在類似的大位止蝕，沽貨時不問價去沽，造成止蝕價很低，到沽盤耗盡就會反彈。
至於中期及長期走勢，就要睇黃金係唔係已轉入長期大熊市，大熊和小熊有本質不同，若是小熊無所謂，但若是大熊市整體轉勢，跌幅可以好驚人。不要忘記黃金由800美元升上來，下行空間廣闊。黃金大升係因為美國2008年爆發金融海嘯，聯儲局大印銀紙，美元轉弱，資金避開貨幣投資，流入金市避難；若然美元轉強，黃金係有打回原形的風險，但現在未能確認是大熊還是小熊。
我覺得中期走勢較明確，隻小熊好像樣，有70%、80%，睇吓圖，黃金近年一直守住1500美元，但今次終於穿了(見附圖)，若不能快速回升到較高位置，如1550美元，並守於其上，其下行走勢將形成，往後真係仲有100、200美元可以下跌。我老友就係呢種買黃金揸幾個月的中線投資者，佢問我點睇，我答佢話中線買唔過，怕反彈完仲有得跌。
策略錯配 贏可變輸
至於黃金長線走勢雖未確認，但已有60%機會係一個長期熊市，與黃金和對應的美元基本因素有關，黃金本身弱勢的基本因素是中國、印度等新興市場需求長線轉弱；美元強勢的基本因素是美國經濟復甦，到某一個地步聯儲局要加番息，咁資金更加會由無息的黃金流番入有息的美元，要等這些基本因素確認，黃金的大熊市才可確認；否則如美國經濟復甦又再反覆，咁黃金跌到咁上下，又可以有較大型的反彈，雖然我愈來愈相信黃金高位已見，再升也好難升穿1900美元的歷史高位。
如果你想買金或沽金，問我建議，我就先要睇你係短、中抑或長線，若我唔知你的投資或炒作行為係長定短，我傾向睇淡，但你沽貨短炒，定咗20美元止蝕，依家一沽下去，可能彈到1520就要打靶。所以合理的建議是短期要兩面睇，追沽有風險，馬上做可能等佢亞洲市再插吓時博反彈仲睇高半線；中期主調向淡，可以候高沽貨睇中期；長期偏淡，但跌得深時，不排除借美國的經濟消息，出現幾個月的大型反彈。
講咗咁耐，你可能話我都唔炒金，你講金我唔啱睇。其實炒作也好，投資也好，道理相同，你睇得通一樣，也睇得通其他。你想動手買一樣東西，首先要問自己，想短炒？中線？還是長揸？搞唔清楚，睇啱可以變睇錯。例如你睇淡黃金，見佢大跌，馬上撲入去沽，例如回到1490美元沽咗，但佢過兩日可能彈番上1520美元，咁就頂唔順走咗，這種行為和事先定好止蝕盤唔同，只是隨市場氣氛睇吓新聞的條件反射，好易輸錢，策略錯配，是將贏變輸的致命原因。
第一要搞清楚自己想點；第二最好順勢而為；第三是部署好入市位和退路。順勢易過逆勢，若只是炒一兩日，黃金係可能有反彈之勢，但這只是極短線的行為，唔得要走。佢中長線大勢還是偏淡，若想從事這種較長時間段的投資，還是搵位沽勝算大一點。以中線而言，應靜候佢反彈，等彈上較高位時分段沽之，部署好，等較高位才沽，可增加取勝機會，減少止蝕的機會。
黃金勢弱 金股難炒
炒股也一樣，如早前講過的思捷(330)，佢在2011年因為中期業績唔掂，可以由20多元插到10元樓下，但跟住到2012年初大反彈到18元樓上，再向下插。依家得番9.99元。2011年時長線睇淡佢係啱，但佢連插幾個月插得太急時，亦可以有一個近1倍的中線反彈，彈完先至再下探。當佢跌得太多時，短線要沽的人沽清，但不能排除有些人手上貨多，等到佢跌到殘才挾上，引散戶見反彈以為轉勢入市接佢地的貨。所以一隻股長線睇淡，都唔等如沽佢一定贏，入市計劃唔好，入市位唔好，都可以輸。
睇完呢啲一個又一個的例子，你地應該明白，炒股炒好，炒其他東西也好，其價錢運行不會只得一個方向，以黃金為例，如果日日跌84美元，跌18日就可以跌到零，當然唔會咁。即使向下，都係走一段、回頭一段、再走一段，上同落都有人賺錢。散戶若是短炒，宜順勢，跟風走一段走兩三個月，入得快，願意走，都可以搵到錢。另外唔好死牛一邊頸，過去買開佢升，就以為佢永遠都要升。
順便講一兩句金股，金股是黃金的擴大版，因為經營金礦獲利時，利潤會比買實金多，但據講依家黃金開採成本高達每盎司1200美元，黃金價跌，但成本彈性低，跌價直接食入利潤之中，金股受衝擊最大，所以金股未來都幾難炒也。
陸羽仁
上一頁 下一頁
金融High Tea 舊文
