金融High Tea——財富大轉移
2013年4月29日
期指今日結算，上周五末段再玩衝高，恒指在上周五升近22700點，收市報22547點，仍升146點，升幅0.7%，特別係內地股市跌1%，香港仲有得升，真係硬淨得緊要囉。月中插到落21400點時引來好多追沽，如今一網打盡，股市是財富大轉移之地。
人在時代巨變中，好多時都感覺唔到，唔識反應，2008年金融海嘯後以美國為首的央行巨量印鈔，就係呢種巨變，唔好話老散，連「債券大王」格羅斯(Bill Gross)都反應唔切，佢在2008年話美國聯儲局搏命印鈔去買美國政府濫印的債券，債券將來唔值錢，債王睇淡美債，係一個好震撼的消息。但一年過去，到2009年美國國債價格因為聯儲局買債而上升，債王睇錯市，或者佢長線睇淡美債的基本因素係啱，但係基金要一年一年埋單，短期計變咗睇錯，佢跟住就轉軚，一路睇淡一路買，反敗為勝。債王呢個例子，亦說明中短期炒作，不能和資金流向鬥氣。
最近又睇到債王格羅斯接受《金融時報》訪問，發現佢繼續睇好美債。佢話由於美國聯儲局、英國、歐洲及日本央行鬥印鈔票，現時金融市場到處都是資產泡沫，投資者現時在平衡投資風險管理及考量報酬問題，已變成哪種資產泡沫最小。
銀紙氾濫好嘢難求
佢話，目前企業債券利息相對國債的利差太小、存款市場利率也太低，而股票價格則太高(相信指美股)，這些投資「當中許多都有風險」。投資人雖然可以選擇離場觀望，但把現金暫存在貨幣市場的報酬率只有0.2厘，因此最佳投資選擇，自然落到相對安全的美國國債上，因為美國國債至少有聯儲局的政策支撐，通脹亦相對低落。除非目前各國央行推行的印鈔及壓低利率措施，真的創造某種程度的經濟成長，那麼債券市場才有可能由牛市轉為熊市，否則長達30年的債券牛市，並未見到終止的跡象。
你可能話，我都唔買債券，格羅斯咁講關我乜事？其實有關係，首先債王估計利率在未來一段時間仍然低企，無咁快結束，他的理論是除非各國印鈔搞得好經濟，才會停印鈔兼加息，但佢認為印鈔救唔起經濟，央行被迫印落去。由此推論，唔好講長遠，未來一年都無加息跡象，投資者就自求多福啦。
以美國聯儲局為首的多國央行瘋狂印鈔，幫自己害鄰邦，谷高自己經濟，搞到他人高通脹，已是不爭的事實，更造就財富大轉移，大量靠食息過日的存款者受損(特別係退休人士)，敢借錢炒作的玩家得米，當然，香港股市無乜升，只是樓市升，呢幾年只係敢炒樓人士得米，當然泡沫爆破時走唔走得到係另一個問題。
不過央行狂印鈔的副作用，是製造一個又一個的泡沫，而且央行印鈔等如繼續吹氣，令泡沫暫不爆破。搏命的炒友泡沫唔大唔合胃口，但一般人唔想搵命博，就只能找無咁大泡沫的的資產投資。由於美股升得太多，債王認為貴，港股升唔多，按理較便宜，問題是美股升得多唔大爆都可能小爆，以港股跟跌唔跟升的樣衰性格，到美股跌時港股都會回，所以現時買港股要冒美股回落的風險。
我認為內銀股就係相對無乜泡沫的投資類別，但現在似乎跌得未夠深，最好等美股插一插，港股跟着尋底時買。
可以睇睇內銀股剛公佈第一季業績，表現唔錯，特別係工行(1398)和建行(3988)更佳。我一直留意四大國有銀行和招商銀行(3968)的經營狀況，佢地首季表現理想，以建行第一季純利增長最快，有595.8億元人民幣，增長15.7%；其次工行有687.4億純利，增長12.1%；然後招行有130.2億，增長11.8%；中行有398.2億，增加8.2%；農行470.1億，增加8.2%。
股平樓貴明顯不過
外界擔心內銀的狀況，第一係壞帳，第二係利率自由化、息差收窄盈利倒退，所以內銀只得6倍市盈率、5厘幾息率，咁高息咁低市盈率代表股價好低，代表投資界認為佢地有盈利下滑的可能，所以睇淡佢地。但睇內銀第一季業績，兩大行工行和建行仲有雙位數盈利增長，肯派息的中行衰衰哋仲有8.2%增長，唔失禮喎。若講壞帳，內銀不良貸款率首季保持平穩，大行中以工行的0.87%為最低，建行和中行都唔差，未有壞帳急增的情況。
外界對內銀嘅另一個擔心，係資本唔夠要進一步集資。我過去比較鍾意招行，因為佢係商業銀行，作風比國有銀行積極進取，但招行最大問題係資本唔夠國有銀行多，為應付新的資本要求，有集資需要，首季末招行核心一級資本充足率有8.6%，雖然有改善，但仍遠較工行、建行的11%為低，所以面對資本要求不斷提升時，建行、工行就有優勢，佢地未來有較少集資需求，有較高派息能力。綜合來看，建行仍然是內銀首選。
每年4月尾內銀公佈首季業績時，內銀股都會反彈，彈完多數又再尋底，建行現價6.38元，佢一個月低位5.98元，去年見的一年低位4.71元，我估佢今年未見低位，5.98元低位未必守得住，但若不出現超常危機，跌下去時去年低位4.71元唔似會穿，若等佢回到5.5元時吸納，歷史市盈率只是5.7倍，若跌到5元吸納，歷史市盈率更是5.2倍。建行首季盈利升15.7%，唔好預佢全年都有咁多增長，假設全年純利只是增長10%，純利上升等如市盈率下跌，若5元買到，以2013年盈利計預測市盈率只有4.68倍，可說是超低市盈率。約5倍市盈率係乜意思？假設間公司未來5年盈利不升也不跌，只要5年你的投資就可以翻本，隻股5年盈利加起來已等如股價。
我在文章初段講到，債王都要避開泡沫，要投資到泡沫較少的地方，我覺得內銀股就係較少泡沫的地方，若用「市盈率」的概念睇樓價，好多商舖回報都在2厘以下，用市盈率的概念係50倍市盈率，你話50倍市盈率同5倍市盈率比較，邊個貴邊個便宜？ 住宅回報高少少，但好多都唔夠3厘，換成市盈率的概念係33倍，仍然係超貴。你可能會話，內銀的盈利可能大跌，所以現時的市盈率唔作得準喎。我同意唔可以完全排除呢個可能性，內銀的確有少少風險，但商舖、住宅的租金亦可能大跌，你估現時的高租金易保持，定有一定壟斷性的內銀盈利易保持？
中證監迫基金持貨
呢個世界無嘢完全保證安全，存錢在銀行好似好安全，但利息近乎零，假設通脹率為3%，即係銀紙每年以3%貶值中。等內銀回到低位時買，即使放埋一邊唔郁，收佢5厘、6厘息，跑贏通脹有餘，起碼唔使被人轉去財富，亦唔使太傷腦筋。
阿爺見內地股市弱弱地，又出招救市，中國證監會上周五建議提高股票基金的倉位下限，擬將股票基金的倉位下限由60%上調至80%，即係基金由唔可以揸多過40%現金，減到唔可以多過20%現金，中證監此舉變相推動資金入市。不過按歷史數據顯示，內地股票基金倉位多介乎80%至90%，只有約14%的基金倉位在80%以下，即係受影響的資金有限。按過去的經驗，阿爺出招內地個市會彈一彈，但若然市弱仍會繼續尋底幾個月，那些反覆尋底期就是入市的好機會。
陸羽仁
上一頁 下一頁
金融High Tea 舊文
