兩年後才爆?
2013/5/10 上午 09:42:44
網誌分類: 經濟
美國最近一周的首次申請失業救濟人數跌至32.3萬人，創下2008年1月以來的最低紀錄，市場則預期會輕微增加至33.5萬。包括食品和飲料巨頭Dean Foods Co及新聞集團(News Corp) 等多美企亦公布了好過預期的季度成績表，股價大漲。
不過，大市卻未有好似前幾日咁繼續炒上，杜指中午再度刷新盤中新高(15145點)，但隨即回軟，收市倒跌23點，收15083點，結束連日升勢；標普500指數亦跌6點，報1627點。作為技術回調，力度都相當細。
大市回軟，主要原因係中國4月CPI增長2.4%，高過市場預期，通脹有抬頭跡象，使投資者憂慮中國可能會進一步收緊流動性，打擊了投資氣氛。GFT Markets市場策略師拉紮克紮達(Fawad Razaqzada) 認為，「一旦發生這種狀況，全球都會為此付出代價。但鑒於中國CPI增幅比預期值只高了一點點，我們認為市場可能有些謹慎過頭了。」
因成功預言全球金融危機，同時長期睇淡經濟前景而被稱為「末日博士」的紐約大學教授魯賓尼(Nouriel Roubini) 則認為，美股大市起碼仍有幾年可以玩。他日前在拉斯維加斯出席一私人晚宴活動時稱，美國股市目前還沒有陷入泡沫區域，但未來兩年風險資產大幅走高將把市場推向大崩盤的邊緣。
他指出，「華爾街和民眾之間的市場情緒存在一個巨大的鴻溝」，華爾街熱火朝天，但由於美國經濟仍很疲弱，普通民眾卻感覺不到。他預測美國因為加富人稅及削減開支影響，美國今年的GDP增長會係1.6%至1.7%，但不至於出現雙底衰退。
魯賓尼對於美股不斷創出歷史新高，認為美國股市目前還沒有陷入泡沫區域，要準確預測泡沫及其爆破亦唔容易，美國以至全球經濟正面對雙重拉力。一方面係已發展國家經濟疲弱和失業率高企，藉著推出更多的量化寬鬆(quantitative easing)及維持零利率政策，以支撐經濟復甦，已經變得合理化；但另一方面，大部份的流動性並沒有推動實體經濟增長，流入了資產及證券市場，造成危險的泡沫。他認為泡沫唔會即時爆破，但長期維持零利率，例如三至四年，資產泡沫肯定會爆，一旦爆破，股市會大瀉，全球金融又會重蹈2008年金融海嘯的覆轍。
講股市一年都嫌多，話兩年後才爆泡，等如叫你馬上入場炒。末日博士早兩年都覺得量化寛鬆唔會搞掂，好似海嘯馬上再來，買乜都衰咁，如今卻變成樂觀，你話放水幾大威力。
話開放水，費城聯儲銀行總裁Charles Plosser話佢想見到聯儲局好快降低量寬買債規模。無人壞疑佢想見到呢件事，因為佢係出名聯儲局內的鷹派，呢一期佢仲無投票權，所以市場對佢講話無大反應。
要估聯儲局主席伯南克會唔會收水，同佢任期有關，佢任期將於明年初屆滿，成日傳佢唔會續任，若有此可能，更加唔會放手，以免證明佢「大放水救經濟」的試驗唔掂，所以唔似會停手唔放水喎。
陸羽仁
回應(9) 我想回應
陸羽仁 BLOG 舊文
