金融High Tea——同人唔同命
2013年5月7日
內地繼4月製造業PMI回落，服務業PMI同樣錄得下跌。匯豐銀行昨日公佈資料顯示，中國4月匯豐服務業採購經理人指數(PMI)由上月的54.3跌至51.1，創下20個月低位。匯豐中國綜合產出指數從3月份的53.5降至51.1，顯示產出增速微弱，為去年10月以來最低。PMI資料仍位於50榮枯線上方，表明經濟仍在擴張，不過就有點放緩。
內地宏觀經濟數據唔理想，但中港股市未有受到影響。原因除了美股因上月失業率降至7.5%，非農業職位增加16.5萬份，遠勝預期，再創歷史新高，利好投資氣氛外，有消息指內地素有QFII大本營之稱的中金上海及中金北京，分別以市價豪擲10.15億元和1.70億元，買入滬市43隻大藍籌和深市7隻個股，頂住大市。上證綜指漲1.2%至2231點，重上2200點水平。
股神加入睇淡中國
好彩係中美股市造好，港股唔會差得去邊。恒指朝早高開277點，但始終受制於23000點，收報22915點，升225點；國企指數跑贏恒指，收11002點，漲156點。大市交投偏淡，成交只有519億元。
股神巴菲特的巴郡公司一年開一次股東大會，股東如去睇演唱會咁睇股神唱獨腳戲，股東會接近尾聲時，一位來自上海的投資者詢問巴菲特是否有新計劃投資中國，股神回應話︰「中國沒有競爭優勢。」佢咁講同2007年10月首次投資中國大連時說︰「中國經濟有着巨大的發展潛力」，差天共地，至少都反映咗美國投資者暫時對中國股票無乜興趣。
雖然說中國經濟增長放慢，但你睇第一季內地企業盈利其實唔差，德銀大中華首席經濟師馬駿分析了內企盈利，話到四月底睇咗194間在外地上市中國公司首季業績，第一季盈利平均按年增長10.1%，遠比去年首季盈利增長2.7%好。在市場有盈利預測的公司中，佔了58%市值的公司首季盈利好過預期。如果睇返內地上市的A股公司情況亦差唔多，佢地首季盈利按年增長11%，遠比去年同期增長1%為佳；佔42%A股市值的公司首季業績優於預期，29%符合預期，整體表現不俗。以行業計銀行、保險、石油和天然氣公司首季業績好過預期，公用事業符合預期，但建築機械、汽車、造船、原材料行業差過預期。
外資轉軚至少等兩季
馬駿認為，?家大摩MSCI中國指數以未來一年盈利計只有預計9.1倍市盈率，反映市場過度悲觀，過住當盈利有10至11%增長時，MSCI中國指數應有13.4倍市盈率，如今市盈率低咁多(亦即是股價低咁多)，意味市場估計中國經濟以至企業盈利在未來季度會重大減速，但佢唔同意呢啲估計，認為中國在軟着陸後會加速番。
如果比較一下美股，首季雖然有70%標普500指數成份股盈利高過預期，但美股平均季度盈利增長只有4.1%，而且主要透過削減成本造出來，遠比中國公司首季盈利增長10至11%為低，但美股仍創新高，中國股票差唔多要創新低，真可以話同人唔同命。股神一句話已反映外資睇淡中國，要如德銀所言要外資扭轉睇法，要等中國有兩季高增長先至得喎，即使會發生都要等吓先啦。
陸羽仁
上一頁 下一頁
金融High Tea 舊文
