金融High Tea——錢荒市
2013年7月10日
■和黃受和記3、屈臣氏及赫斯基能源雙位數增長帶動。2015年之前，將每年持續錄得10%以上盈利增長。
內地繼續「錢荒」，港股繼續反彈。內地經濟數據亦麻麻，6月通脹率(CPI)較去年漲2.7%，通脹平緩，其中只是食品價格上漲4.9%升得較多；工業品出廠價格(PPI)較去年降2.7%，雖然比對上一個月稍有好轉，但連續16個月出現負增長，反映內地企業活躍度仍在下降。有分析家指，這種情況下即使中央出台刺激政策，下半年經濟形勢也很難好轉，何況阿爺不似出招，全年經濟增長能夠有7.5%已算不錯了。
內地PPI連續下降，即係工業品出廠價連年下跌，反映產能過剩，產品需求萎靡，推算下去原材料、煤炭、鋼鐵和大宗商品等行業虧損只能更嚴重，中國整體經濟現正呈現下滑局面。長江商學院金融學周春生教授認為，即使中央再推經濟刺激政策，加大貨幣供應量，也很難取得像前些年那樣的效果，原因係2008年的「4萬億」計劃在前期造成大量投資，生產能力過剩，加上過度生產使得庫存大量堆積，目前仍然處於「去過剩產能」的階段。貨多需求少，利潤十分微薄，不少企業都面臨不同程度虧損。他認為經濟刺激政策並不是萬能，歐洲地區和日本政府現在都使用貨幣刺激，但當地經濟危機並沒解決，就是一個證明。
穆迪分析發表報告指，中國6月份生產物價指數按年減2.7%，略優於5月份按年跌2.9%。多個行業仍受產能過盛問題困擾，且欠缺政府政策支持，故該行預計環球經濟仍未見完全復甦的前提下，原材料過剩情況會持續至年底。
穆迪估過剩到年底
經濟放慢同時，政府又被逼以水緊策略，令經濟體系減肥。昨日大陸錢荒風暴稍緩，上海銀行間同業各期限的拆借利率全面下跌，人民銀行昨日繼續全面暫停公開市場操作，唔放水又唔收水，實施所謂「緊平衡」策略。
中環茶友話，港股近期走上落市，昨日升100點收20683點，但成交只有442億。話貴，港股絕對唔貴，有些外資行都開始話港股可以開始買，問題係本地經濟放慢，大陸經濟仲衰，加上一個錢荒市，內地資金緊張，講來講去只有美股一個因素，可以推高港股，其餘都係壞因素居多，短線仍然係造淡易少少，要等港股跌得深啲，才有轉頭睇好嘅條件。
雖然話大市弱底，但睇唔同類別股份肯定有唔同，國企指數昨日仲要跌0.3%，表現差過恒指，個別弱雞類股份如中國建材已跌穿上月24日大跌底，當日低位6.7元，但昨日低見6.07元，收市跌1.9%，收6.19元，大市未穿底佢穿哂底。
想當日大跌日經紀張問我好唔好撈中建材，我話「小心4樓跌落嚟跌斷腳喎」。佢問點解，我話中建材係弱股，今年高位12.8元，急插到當日無咗差不多一半，好似架𨋢由8樓急墮到4樓，但你以為佢跌咗好多唔會再跌，但佢再插幾層樓可以跌斷你隻腳。我知散戶鍾意買呢啲弱股貪佢彈得勁，但我都忍唔住提吓佢再急跌的風險。
大摩睇好和黃增長
反觀跌市中亦有強股，匯控(005)係其一，和黃(013)係其二，最近呢一浸和黃表現好過匯控。由6月24日的77.05元反彈至昨日的84元，已有近7元或超過9%升幅，同期匯控反彈唔夠8%。
大摩預期，和黃受和記3、屈臣氏及赫斯基能源雙位數增長帶動。和黃在2015年之前，將每年持續錄得10%以上盈利增長。大摩又認為和黃過去13年表現均跑輸怡和，預料和記3會在今、明兩年錄得17%/12%EBITDA(未計利息稅項折舊攤銷的現金收入)內部自然增長，會在2014年錄得自由現金流。大摩指和黃市帳率0.9倍，市盈率13倍，派息3%，較資產淨值折讓31%，估值吸引，評級「增持」，目標價94元，行業展望為「與大市同步」。我話唯一唔好處係和黃反彈得太多，最好等回吓先買。
陸羽仁
上一頁 下一頁
金融High Tea 舊文
