金融High Tea——克強哥唱「高音」
2013年7月12日
《易經》講，否極泰來，又話福兮禍所倚、禍兮福所伏。今個星期內地公佈好多數據，市場睇死唔會有乜嘢好消息，唔知係咪因為內地管理層驚數據太驚嚇，所以派暴力哥連日出手，加上外圍伯南克為退市降溫，結果令中港股市齊齊被暴力夾高近千點。
兩地官府接連出手，聯儲局主席伯南克及李克強總理先後發功，投資者炒番轉的信心提高。杜指期貨急抽，內地A股大幅反彈。上證綜指抽升3.2%至2073點。港股做番齣好戲，恒指勁升533點至21437點，國企指數仲勁，跑贏全區，大漲3.7%，收9552點。大市成交731億元，較上日大增接近四成！
講到提振股市力度，茶友認為總理李克強唱一唱推高，先係重點所在。
博士總理在廣西主持經濟形勢座談會時指出，中國正處於必須依靠經濟轉型升級才能持續健康發展的階段，統籌推動穩增長、調結構、促改革十分重要；並強調面對當前形勢，要做到穩中有為，完成全年經濟社會發展的主要任務。經濟運行要處於合理區域，要經濟增長率、就業水準等不滑出下限、物價漲幅等不超出上限。要「調結構、促改革與穩增長、保就業或控通脹、防風險的政策有機結合起來」，且避免經濟大起大落。
水泥建材股聞歌起舞
他仲話，中央財政將持續加大對中西部地區，特別是貧困地區的支援力度、推進新型城鎮化，以發展服務業、淘汰落後產能、加大結構調整力度。
總理大打「維穩牌」，話會加大中西部投資。水泥及建材股聞聲而起，潤泥(1313)、山水水泥(691)飆高超過一成，安徽海螺(914)升8%，西部水泥(2233)及中國建材(3323)齊漲超過6%。藍籌股僅得恒安(1044)下跌，A股發力爆升，內地保險、證券及A股ETF齊齊上揚，國壽(2628)飆6%。
家股市已經唔可以單靠政策概念，最實質仲係硬橋硬馬入市買貨。前日內地A股有神秘買盤重手掃貨，被稱為「暴力哥」，由於佢力量無窮而架式生硬，好多人都覺得呢啲係官方動作。昨日大市受外圍好消息推高，但升勢唔係咁勁，直至「暴力哥」狂掃中石油(601857)、中石化(600028)兩隻權重股，內地升勢加速，香港先至夾上去。
公然調戲權重股
暴力哥打橫行，托市的心理效應無疑明顯，同時都惹起市場人士竊竊私議，有私募基金就在網上質疑，如果不是「有料到」人士，普通投資者敢掛這麼多個9900的大單？真的不怕會被查嗎？昨日好多大單由9900個改成4444個，市場人士又不滿，批評這樣是「調戲」市場。
假設暴力哥真係代表阿爺出手，咁後市係咪要睇番好呢？短期嚟講，國家B隊出動，當然係刺激因素，但同時都要睇吓背後原因。有人估中央托市，係為重啟新股上市鋪路，但我睇反而可能係因為今個星期不同數據都麻麻，管理層可能驚太過驚嚇，包括即將公佈的增長數字，相信唔止唔靚仔，仲可能幾醜樣吓，與其做其他嘢，不如直接托實個市仲直接。假如呢個分析無錯，國家隊目標係保底護市，唔係大幅炒高，亦唔係睇好經濟前景，咁個市彈到咁上下，佢哋就可能放番手，屆時個市先見真章，所以炒短線博反彈唔拘，但暫時唔適宜睇得太好，如果貨重者，係可以諗吓係咪睇位減減磅先。
陸羽仁
上一頁 下一頁
金融High Tea 舊文
