金融High Tea——敵退我進
2013年7月25日
內地管理層近月不斷放出降低增長目標的汽球，慢慢令到市場產生預期，似乎已經開始奏效。匯豐中國製造業PMI跌至11個月以來最低，7月初值只有47.7，已連跌4個月；港股卻未受影響，先跌後拗腰，一度挨近22000，全日升逾50點收市，恒生指數連升4日。
恒指前日大升近500點，夾倉味道甚濃，大批熊證因此意外死亡，夾淡友的戰術昨日睇得仲清楚。若果留意期指市場，大市昨日因為PMI數據大跌，指數急插落嚟，期指同步急挫，不過稍為回落後，即見好友力托，雙方擺明角力，扯上扯落，力頂住喺高位唔肯落。
期指激戰 現貨較淡靜
現貨市場戰況睇落無咁緊張，上落無期指咁多個回合。不過，雖然市傳內地四大銀行首3周流失萬億元人民幣存款，新增貸款亦僅2200億元人民幣，內銀股先跌後回穩，可見有人力撐住大市，到午後市場開始消化該利淡消息，港股尾市掉頭回升，恒指收報21968，升53點；國企指數收報9778，跌1點，成交金額縮至498億元。
照昨日市況捉路，大戶係想頂高結算，但佢哋好可能採取慳水慳力的玩法，如果你沽得勁佢就走出嚟接吓，如果個市彈佢就放番手，甚至沽番啲貨出街套番啲銀彈，總之就敵退我進、敵進我退，到月尾先至發力撩高嚟結算。
指數升咗一輪，開始炒吓落後股。近期跌得好慘的馬鋼(323)及鞍鋼(347)，昨日表現唔錯，跑贏大市。馬鋼升2.8%，收1.85元，鞍鋼亦升1.1%，收4.43元。
今個月初，國務院要求銀行按照「四個一批」，區分產能過剩行業的不同情況來貸款。所謂「四個一批」，係「消化一批、轉移一批、整合一批、淘汰一批」，並且嚴禁銀行對包括水泥、煉鋼、煉鐵、化纖、電解鋁和煤炭等近10個產能過剩行業發放新增貸款，同時禁止這些行業的多種融資方式。目的係堵截盲目投資，避免加劇產能過剩。願意自動停產或棄產的企業，則可獲減免部份貸款利息或幫助轉產。
企業拒減產 鋼價難樂觀
據悉，目前北京地區部份銀行已經完全不受理鋼貿、水泥等行業的貸款。有業內人士指出，限制產能過剩行業貸款的做法，其實已存在多年，例如北京地區的建行(939)及工行(1398)，已經很少做鋼貿及水泥等行業的貸款。不過，睇中央最新的態度，監管明顯趨嚴。
內地鋼鐵企業生存尤其困難，除了面對融資難、融資成本高的問題外，節能環保力度的加大對鋼鐵企業亦造成好大壓力；另外，內地銀行貸款準則，可以講係唔大唔借。由於企業怕市場份額流失，銀行就會截水，即使鋼價不斷下跌，在沒有盈利的情況下，仍然不願意減產，造成鋼鐵產能過剩的情況不斷惡化。
工信部新聞發言人朱宏任昨日表示，今年以來，鋼鐵行業產量持續增長，市場供需陷入不穩定，鋼鐵行業仍沒有走出低谷。上半年中國累計生產粗鋼較去年增加7.4%，按此推算，全年粗鋼產量預計要達到7.9億噸，鋼鐵價格只好繼續下滑。
全球經濟活力減弱，鋼鐵需求銳減，鋼價下跌，鋼鐵股好難有運行，不過中央如果有效減低行業產能過剩問題，等如減低內耗性競爭。行業龍頭企業股，存活機會自然高好多。
陸羽仁
上一頁 下一頁
金融High Tea 舊文
