金融High Tea——「小救市」再輸血
2013年8月14日
本地市場對內地局部刺激經濟政策反應熱烈，甚至熱烈過內地股市，你睇昨日內地上證綜指只升0.2%，但香港再升269點，升1.2%，收22541點，成交升到732億，可見市場買意增強，大市仲有得去吓。
家炒緊中央的「小救市」，主要有兩個方面，包括透過銀行密集向地方輸血，以及在部份省市加快鐵路、公路、基建等所謂「鐵公基」工程。先講輸血，傳媒報道農行(1288)將向上海提供2500億貸款，惹起市場好大反應，中資金融股升勢最勁，恒生中國H股金融行業指數大升3.7%，遠遠拋離大市，主角農行更大升5.6%(其他內銀升2、3%)。農行咁升法真係有啲炒味囉，因為若然中央係透過農行借錢畀上海，無理由唔透過其他內銀借錢畀其他地方，所以唔應該單係農行特別升得多。我聽到另一個版本，話農行借錢畀上海只是商業行為，借畀上海搞自由貿易區和迪士尼樂園，唔係中央叫佢出招。但阿爺真係出招向地方輸血，不過主要透過國家開發銀行去做。
省市再推「鐵公基」
另外講兩句搞「鐵公基」，原來近期江蘇、安徽、重慶、四川、貴州、陝西等多個省市下達指令，要求各屬下地區加快「十二五」規劃鐵路、公路、城市基建、機場建設，貧窮棚戶區改造等項目，以便推進投資增長。不過昨日材料股不如內地金融股，反應唔太大。
昨日講起內房，即刻炒到飛起，中海外(688)升2.3%、華潤置地(1109)升6%、恒大(3333)升4.6%、碧桂園(2007)升4.4%、龍湖(960)升6.5%。當中比較落後的是恒大和龍湖，恒大衰借貸高，龍湖衰重慶樓唔掂，但在呢啲追尾市，佢哋屬較落後的股份，水位多啲。
在升市中我會留意邊啲股份唔得，確定佢哋係弱股，中銀香港(2388)就係其中之一，昨日逆市跌0.2%收25.1元，一個月高位25.3元成為小頂，一上就俾人派番落嚟。中銀香港係本地按揭一哥，?家一二手樓成交都進入冰河時期，上星期日兩大經紀行十大屋苑成交都得5、6宗，少到得人驚，經紀唔掂，銀行的按揭生意亦瓜得。所以要分清中行(3988)和中銀香港，唔好買錯啦。
中銀電股都唔得
另一類弱股是電股，煤價反彈，煤股繼續上，電股就無運行，因為電廠主要係燒煤發電，早兩年煤價大插，即使電費不可以加，電廠成本大跌都有胡食。家擔心的是煤價不是反彈，而是見底回升，咁電廠就乞米啦，是否如此仍要觀察。
一般升市公用股都較落後，但如今電費衰多一瓣成本上升，昨日普遍向下，中電(002)跌0.5%叫做好啲，內地電廠再差啲，中國電力(2380)跌1.3%、華潤電力(836)跌1.1%、華能(902)跌1%；相對地煤股再發威，兗州煤(1171)再升3.5%、神華(1088)升4.5%，直覺覺得煤股升得太急，燒一輪煙花之後未必得，跟炒強勢股轉身都要快。但電股更加博唔過，隨時成為弱勢股，慢慢落。
陸羽仁
上一頁 下一頁
金融High Tea 舊文
