金融High Tea——融入息升時代
2013年8月19日
上周五是風起雲湧的交易天，內地A股在早上11點幾突然抽升，短短幾分鐘升咗5%，帶動港股急升，由於夾上的手法狂暴，當時仲懷疑係有政府身影的「暴力哥」又再出手，點知後來證實是光大證券大量錯盤買賣，推高了指數。
傳聞的錯盤情景有點離奇。光大證券有班「海歸派」(指有國外學習和工作經驗的歸國人員)喜歡搞新技術套利交易，即是用電腦鈎住市場數據，一發覺和指標有偏差時就大手進場交易，上周五是光證中人向來訪客人展示他們設計的一隻套利基金如何運作之時，錯誤地將示範盤搭上了交易系統，造成至少30億元買盤一下子拋入市場掃貨，才把指數掃高。
故事雖然離奇，但亦非不可能發生，但恕我陰謀論，光證呢個錯誤一下子把期指掃高，若有人事先知道有此事故發生，夾埋外人買定大量期指，一掃高3%、5%就沽，要搵10億、8億話咁易，一句搞錯又唔使坐監，至多無咗份工，但搵咗大水都可以退休啦！所以呢啲離奇錯誤，一定要徹查。至於本地股民因為咁搵咗錢應該偷笑，輸咗錢亦無得追究，只能認命，要知道股市有好多黑天鵝。
呢個世界離奇事有好多，中原老闆施永青沽貨係其中一件。上周手機短訊WhatsApp瘋傳一段類似經紀流傳的消息，話施永青私人持有的物業會全部出售，市場估計有15項物業，共值11億元，傳媒追訪施老闆，佢回應「我話會賣物業啲嘢公開講咗啦！」更氣憤地表示「最主要係香港依家仇視地產投資者，呢啲係地產霸權，仲做嚟做乜呀！做乜要畀人哋當係地主咁鬥喎！」
唱行沽貨 所為何事
街外對施老闆呢個怒掟物業行動，無乜好評，主要有兩種意見。第一，懶憤怒借機散貨。持呢種觀點的人最多，政府無意撤辣招，樓市未來跌多過升，施老闆揸咁多貨當然早走早着，但沽貨會畀人唱唔掂，特別係佢好多物業都係租畀中原自己的舖位，沽貨代表唔睇好代理生意可以做落去，對夥計士氣有打擊，依家一句鬧政府，好似自己沽貨係抗議，好似沽得好正義咁款，其實佢都賺好多啦，獲利離場仲要攞埋個彩。
第二，鋤吓價夾吓業主。地產代理瘋傳施老闆賣貨消息的短訊，唱到咁行，動機就係鋤價。雙辣招出台後，新盤和二手成交都大萎縮，代理食佣，唔怕跌價，怕無成交，依家一間分行一個月開一兩張買賣單，真係捱唔到半年就無命。佢哋早前遊行迫政府放棄雙辣招，但梁振英政府無嘢得，唯有靠打擊樓市攞分，點會睬代理呀？代理媽佢佢當宣傳，仲正。代理鋤唔低雙辣招，就希望鋤低業主個價，樓價跌咗會吸引一班用家出來，成交會上番去。
講來講去，無人同情老闆，呢幾年樓市狂升，公司賺咗錢，炒樓又賺錢，有乜好怨？要同情就同情辛苦做嘢都買唔起樓的小市民；或者同情搵萬零銀依家無錢開飯的小代理都得。估計中原這種大地產代理公司，過去10年夾埋隨時賺咗20幾、30億，老闆自誇咁有良心，在大風大浪時，就應該嘔番多啲出來幫吓啲夥計啦。
美息大升 無人留意
樓市有周期，主要影響因素有三︰利息主導資金供應、樓宇供應周期，以及政府調控手段。現時最有利的還是資金供應，因為利息還是相對地低，最不利的是政府的打擊政策，短期樓宇供應仍溫和。幾項因素加埋，令樓市極度拉鋸。
不過美國聯儲局真係有機會在9月開始減少買債，可視為息升時代正慢慢開始。聯儲局的政策對利息有直接指導和間接影響，聯儲局公開市場委員會，會定出聯邦基金利率的目標區間，這就是我們平日講，聯儲局加息或減息的決定。所謂聯邦基金利率，即是美國各銀行間的銀行同業拆息，代表短期市場利率。所以聯儲局是直接指導美國短期利率走勢，現時聯儲局的說法，仍是低息會持續到2015年，即2015年前不會宣佈加短息。
另外在金融海嘯後，聯儲局透過量化寬鬆(QE)來間接影響長期利率，方法是印銀紙去買國債和按揭證券，以10年期國債為例，聯儲局入市狂買，係人都怕咗佢，買到債價大升。由於債券的票面息是固定的，債券價格升，票息不變，就令回報息率下跌，呢個就是我哋成日講的債息下跌，國債債息亦是所謂無風險利率的指標，亦影響市場長期息率，在聯儲局第3次QE狂買之下，10年期美債債息跌到歷史低位1.38厘，相比2008年「正常時期」的4厘，真係低到爆。
不過自從聯儲局主席伯南克，在6月講過下半年開始收水減少買債規模後，長債債價係咁跌，債息係咁飆升，美股在6月跌完都再上高位，但債價就一直唔掂，債息高踞不下，美國10年期國債債息升至逾兩年高位，上周五報2.82厘，顯示債券投資者好怕9月若收水，只是利息向上周期的開始。不過美息向上的重大變化，本地市場好似無乜人留意。
我就認為投資者要「融入」一個利息向上的時代，點解叫融入，就係初期唔會升得好多好快，但利息已見咗底，未來會反覆向上。你哋可能會關心利息周期向上對乜嘢股份有影響，我估除了借貸較高的股份外，地產股和房託股都會受利息上升的影響。
地產房託 利率敏感
地產股以新地(016)為例，今年1月高位130元，下跌後，4月反彈到高位115元，呢一浪反彈高位則近107元(見附圖)，峰頂一級級向下，仍然是一浪低於一浪的走勢，小心彈完又要回吐。如今唔單講股市走勢，睇基本因素，就要睇9月暑假後，發展商料會再次開盤賣新樓，睇吓賣唔賣得去，怕只怕發展商肯減吓價，但仍然去唔到貨，咁地產股就可能走得更低了。
地產股走勢唔係咁貼利息走勢，相比之下，較跟貼政府政策對賣樓的影響，但房託股明顯和美國長息走勢相關，地產股今年股價高峰在1月已經見咗，但房託股的高峰可以遲至5月才出現，直至美國長債利息掉頭向上，房託股的跌市才開始。你睇領匯(823)，5月上高位46.4元後(見附圖)就急回，上周五大市微跌0.1%，但領匯卻跌1.9%，收報37元，主要因為美債債息升上2.82厘的高位，所以投資者沽呢啲收息的房託股。
你依家睇領匯，市值855億，息率4厘，市盈率4倍，好似都幾吸引。其實唔係咁睇，佢係房託股，簡單啲講，買佢係買一個物業投資組合，似買樓多過似買股，佢去年溢利高達211億，所以市盈率才會4倍咁低，但當中有177億是重估物業的升值，而非現金收益，可供分派的收益只有33.5億，雖然按年升14.6%，但只是和市場預期相若，理論上若以呢33.5億元可分派收益計，市盈係25.5倍，雖然4厘的收益率以買樓嚟講唔失禮，但以買股來講就唔係咁平啦。領匯現價37元，1年前8月佢只是33元；兩年前更只有27元，未來影響領匯股價有兩大因素，第一是美息走勢，第二係佢實際的租金回報。我估到9月聯儲局真係收水時，壞消息兌現，10年期債息可能會回吐一下，或者可以回番落2.5厘或低少少的水平，但到今年底明年初又會再向上進發，領匯就會跟美息走勢升沉。
你可能會話領匯有4厘息其實都好吸引，點解要沽領匯？在一些外國機構投資者來說，可以買美債，也可以買領匯，美債10年債收息2.82厘，收益並無下跌風險，經濟好經濟差，美國政府都會派息。但領匯分派收益來自租金，若樓市大跌，租金急滑，領匯租金收益有下跌風險，派息也不一定長升不跌，投資者要求領匯有「風險溢價」，即係相對美債有較高息差才買得過。
電能抗跌 強過領匯
還有的是，領匯收益相對其他公用股比較又如何？就拿電能實業(006)來比較，電能業務較分散，主要是和經濟周期關係較少的水電等公用事業，現價息率都有3.5厘，是否比息率4厘的領匯吸引？所以判斷領匯價值，關鍵是判斷香港商場停車場租金有無下跌的可能，還是會長升不跌。
無論如何，利息長線向上，不要受過去的經驗影響，以為過去股價好將來一定好。一些因低息受惠的股份，將來走勢就無咁好喇。
陸羽仁
上一頁 下一頁
金融High Tea 舊文
