金融High Tea——上海自貿區有料到
2013年8月27日
個市悶悶哋，真係睇薄薄案仲精采啲，薄公子最後竟然以戴綠帽來自辯，話王立軍和佢太太谷開來「有路」，真係有「你估佢唔到」的效果。
唔知習主席係唔係想沖喜吓，內地股市在薄薄案陳詞結束日大升。內地開始炒作上海自由貿易區，內地股市由頭升到尾，上證綜指收市升1.9%至2096點。恒指高開80點後反覆向上，但唔係好爭氣，上午剛剛升破20天線，已經有氣無力，午後升幅收窄，20天線得而復失，收市勉強企於22000點上方，收22005點，升141點，又出現內地跑贏香港的狀況，國企指數跑贏恒指，升穿萬點大關，漲142點，收10075點，大市交投持續淡靜，成交473億元。
不要忘記本周四係期指結算，家成交咁細，簡直係任大戶去舞，我哋無謂估啦，睇吓大戶做咗好倉還是淡倉，最後就會朝那個方向走啦。
內地股市精采好多，上海自由貿易區概念股最搶眼，有超過20隻相關股份升10%漲停板。上海自貿區得，帶動天津、廣東、山東、海南等其他沿海城市類似概念股爆升，區域經濟概念炒到不亦樂乎。
建行頭炮打響
據內地官場朋友話，唔好睇小上海呢個自貿區，佢係比特區更特，因為過去設立特區多有前提，例如搞「三來一補產業」等，但上海的自貿區無前提，即係搞乜都得，真係有料到。
聞說廣東南沙見上海搞得咁過癮，都想申請改做以對港澳合作為重點的自由貿易區。
若然市旺，上海自貿區概念股已炒過不亦樂乎，至少都炒吓上海實業(363)啩，家無乜郁，昨日上實都只係升0.6%，佢近日雖然彈番少少，但現價都只係8倍PE、4.2厘息，無乜鑊氣。
內銀大行將陸續公佈業績，建行(939)公佈上半年純利1197億元人民幣，每股盈利0.48元，較上年同期增長12.6%，稍高於市場預期，主要受惠於利息收入增加。
建行業績好過預期，大行紛紛唱好。其中花旗、野村、瑞銀及美銀美林等給予「買入」評級；麥格理及瑞信「跑贏大市」。建行昨日微漲0.7%至5.83元，係內銀「九行」中升幅最少。內銀股昨日全線向上，其中中行(3988)及工行(1398)升約1%；民生銀行(1988)及重農行(3618)表現最好，升超過2%。另外建行董事長王洪章就唔係幾滿意美銀不斷咁沽建行股份，佢話去年美銀因為自身的業績出現虧損，所以才拋售建行股份套現近100億元，希望美銀繼續持有建行股份咁話。
比亞迪缺錢大插
亦有出完業績後大插的股份，比亞迪(1211)半年多賺20倍至4.3億人民幣，期內營業額按年增加13.3%至242.4億元人民幣，毛利上升26.9%至33億元人民幣，毛利率上升1.5個百分點至13.6%。但數字顯示比亞迪財務狀況繼續弱化，現金減少債務增加，中期經營現金流入大跌去23億元人民幣，比去年上半年的現金流入44.3億元，跌48%。但於今年6月底總借貸約為204億元人民幣，而去年12月底約186.3億元人民幣，債務在上升中。市場可能唔係咁滿意佢的財務狀況，業績公佈後比亞迪大跌11.6%，比亞迪電子(285)跌11%。隻嘢最有概念的電動車業務無大進展，錢係咁燒，咁搞落去，有集資壓力喎。
陸羽仁
上一頁 下一頁
金融High Tea 舊文
