金融High Tea——經紀真係喊
2013年8月9日
昨日預咗個市反彈，又預咗佢無乜力，最多升過197點，結果只升67點，收21656點，成交只得427億。
大路新聞係中國公佈出口同比增長5.1%，遠超路透社預期的3%。中國7月進口同比增長10.9%，亦遠超路透預期的2.1%。但中國7月貿易順差178.2億美元，亦低過路透預期順差272億美元。中國出口數字咁好，但外國似乎唔係太信，美國市場觀察網站話，中國7月進出口資料均跳升，令人意外，經濟學家懷疑大多數中國統計局資料，尤其是貿易資料經常遭到國外分析員強烈質疑。
但匯市投資者對數字反應幾大，澳洲對中國這個最大貿易夥伴的消息十分敏感，中國貿易數字出街後，澳元反彈0.8%至0.907。
開親賭場都得？
個市悶悶哋，中環茶友講起一單細新聞，賭股奧瑪仕(959)公佈，擬向主席兼主要股東吳文新及其他人士，收購一家公司51%股權，該公司已簽訂兩份諒解備忘錄，以取得在北塞浦路斯土耳其共和國吉爾尼Lara Park Hotel設立及經營賭場之專營權。該公司又與澳洲一間公司簽咗諒解備忘錄，以收購瓦努阿圖維拉港Grand Hotel And Casino 100%權益，計劃在收購後申請博彩牌照，在該酒店經營賭場。奧瑪仕公佈消息後，昨日最多升24%，收市升15.4%，收1.2元。
瓦努阿圖好似只得十幾萬人，申請移民成為瓦努阿圖人，又唔使去當地，咁在瓦努阿圖搞個賭場又俾邊個去賭呢？個古仔好似有少少漏洞喎，唔通真係在「山旮旯」開兩間賭場都得？
代理股要避開
講開瓦努阿圖，經紀張話佢買咗內地股輸到喊，就嚟真係要移民去瓦努阿圖咁話。我就話你唔好亂講「輸到喊」，我真係聽講有經紀喊，話說有朋友賣樓，本來搵咗經紀甲和經紀乙分別放盤，後來經紀甲做成咗，朋友打去通知經紀乙唔使再做啦，經紀乙喊咗出嚟，話佢幾個月無開單，今次呢單又做唔成，實聽俾老闆鬧死啦。
做唔成生意搞到喊，認真激，地產經紀的悲慘情況可想而知，對佢哋的處境寄予無限同情，希望可以捱得過。但係話有過萬個經紀可能被淘汰，真係一啲都唔誇張。而家佢哋又示威又遊行想叫政府取消辣招，或者至少取消本地人用公司買樓的限制，我覺得成功機會等如零。家「思歪」政府無嘢可以攞分，唯有打擊樓價有分加，所以一定博老命，雖然樓市淡靜，但樓價亦無大跌，小型樓仲要陰陰上，弄不好政府唔係減辣招，係倒過來加辣都唔奇，這個冬天相當長。
在這種環境，地產代理股真係掂都唔好掂，家上市主要兩隻代理股，美聯(1200)昨收3.12元，市值仲有22億，佢個仔美聯工商舖(459)收0.05元，唔好睇個價咁細，市值都有6.9億，兩隻相比阿媽更貴，不過兩隻都掂唔過，家聽講佢地開始每月要蝕錢，美聯唯有望9月後發展商開新盤賣得，但暫時都係得個望字咋。
陸羽仁
上一頁 下一頁
金融High Tea 舊文
