梅菲定律
2013/9/13 上午 09:17:18
網誌分類: 經濟
美國國務克里昨日與俄羅斯外交部長拉夫羅夫在日內瓦商討如何處理敘利亞化學武器問題，雖然未有共識，但「敘利亞風波」由「大火」變「小火」，恐怕搞幾搞會變「無火」。
美國就業數字又顯示經濟唔差，昨日公佈的最近一周首次申請失業救濟人數減少3.1萬，總數降至29.2萬，遠低過市場預期的33萬，更係2006年4月以來最低水準。雖然分析師普遍認為，聯儲局會由下周開始正式退市，但一日未揭盅開，仍然係未知數。在「不確定性」的情況下，投資者變得愈加謹慎，美股亦沒有了方向，反覆偏軟，結束連升7日的走勢。杜指跌26點，收15301；標準普爾500指數挫6，報1683點。
昨日拖住美股後腿的主要係能源股及貴金屬礦業股。原因係中東局勢緩和，導致原油及黃金價格回軟，紐約原油期貨回落至每桶108美元水平，而黃金下滑至每安士1323美元。
在美國可能出兵敘利亞的情況下，黃金一度反彈上1400美元，當時的黃金大好友Dennis Gartman在8月22日對CNBC話：「我有幾多錢投資，就會放幾多錢入金市。」結果話口未完，金價短期間大瀉超過40美元，昨日更跌到1323美元，佢昨日終於承認自己睇錯。
事實上，當時認為金價已經見底，由熊轉牛的投資者，大不乏人。但俄羅斯忽然拋出一個可行的外交方案，解決了美敘衝突，全球經濟好轉，聯儲局退市預期升溫，又令商品價格回軟，再來一個股市繼續炒上，加埋加埋，令到在8月底炒金的投資者陷入一個「激死人」的梅菲定律(Murphy "s Law)，意思是「凡是可能出錯的事必定會出錯」(Everything that could go wrong did go wrong.)，結果就焦頭爛額。
梅菲定律的梅菲並非鐵甲威龍的主角，其名稱由來是在1949年美國空軍研發高速載人工具火箭雪橇MX981發展計劃，負責人John Paul Stapp上校，研發工程師愛德華·梅菲，當時實驗已清晰要求參與工作人員在某一個工序要用夾正面將器材夾好，結果還是有人連續47個夾都夾錯了，故此引申出一件事本不該發生，但一發生可以差到極限。好似麵包本來不該跌落地，但偏偏要落地，而且跌的時候，永遠是塗牛油的一面着地。
Dennis Gartman對CNBC表示，雖然唔鐘意股票，但而家係買股票，唔係買金的時機。梅菲定律教我地任何一個事件，只要有大過零的機率，就不能夠假設它不會發生。投資世界更是如此，乜嘢事情都可能發生，唔好假設自己無可能出錯，要在出錯時少輸、唔輸、甚至贏錢(夠快反手就得)。
陸羽仁
回應(2) 我想回應
陸羽仁 BLOG 舊文
