金融High Tea——富貴雲遊
2013年10月4日
幾個大孖沙近日頻頻出招，繼長和系李超人醞釀分拆大件資產後，恒基李四叔都玩番吓動作，將名下私人持有的恒基系股票，全部賣番晒畀上市公司，收番接近30億元。由於動作唔算大，市場估計佢只係熱身，應該仲有下文。
本地華資周身動作，頻傳分拆消息的和黃股價再升，收市報96.85元，再創近年新高，對市傳將會分拆屈臣氏的和黃(013)，投行美銀美林認為，分拆有助釋放和黃價值。報告指出，屈臣氏估值為1490億元，相當於2014年10倍EBITDA，業務亦在亞洲及歐洲平均發展，相信分拆屈臣氏有助釋放價值，維持「買入」評級不變，目標價101元，反映2014年每股資產淨值(NAV)126元折讓兩成。
小恒基博發大
係公司消息推動下，恒指高開後升幅擴大，突破十天線，恒生指數收報23214，升229點或1%；國企指數收報10514，升180點，成交金額532.6億元。對李四叔搞邊科，中環茶友各抒己見，大致估計有兩個，一係同私人家產配置有關；另一個係公司想重組吓架構。有茶友認為，假如係同家產配置有關，照計唔使牽涉上市公司，照常理應該係重組機會大啲，家大股東先賣清所有關連資產，起碼企業間關係會清楚咗。
由於憧憬有動作，恒基系反應係愈細隻升得愈和味，恒發(097)表現最省鏡，收報0.68元，爆升0.12元，幅度超過21%；香港小輪(050)都升0.07元，恒地(012)同煤氣(003)都逆市走低。茶友話，市場反應好簡單，恒地同煤氣都係市值以千億元計巨企，股價上落要睇業績同基金估值，唔容易玩乜嘢財技，聽到消息都無乜好炒，相反，「小恒基」市值得二十幾億，假如大股東要帶挈佢都容易啲。
茶友話，「小恒基」本來持有煤氣同收租物業等資產，由於業務同恒地重複，多年前出售咗大部份資產畀恒地，然後大派高息，之後一直無乜動作。?家四叔將自己手頭股份賣埋畀上市公司，市場就估佢無理由賣間空殼公司股份畀上市公司啫，由此憧憬佢有動作。從昨日成交有成1.9億股，可見好多股民都走嚟趁墟。不過，呢類炒作概念，有時不能太心急，因為就算有動作，可能都要煲番咁上下時間，散戶如果高追，有可能短期摸頂，咁就好易俾人震倉。
內地網絡遊戲公司雲遊(484)首日掛牌，收報67.5元，較招股價51元，高16.5元或32%，不計手續費賺1650元，散戶中到一手都相當和味。另外，騰訊(700)澄清未有自行直接申請銀行牌照，收報419.8元，升4.8元或1.16%。
基金果然要掃貨
雲遊招股熱爆，掛牌前我已講過基金話無貨，散戶若然抽到，唔使開市即沽，不妨睇多一陣。昨日上午見到果然係基金買貨、散戶沽貨，故此股價愈升愈有，股價炒上高位收市。雲遊上市價唔平，但呢類股份選擇唔多，加上概念當炒，基金最怕係蝕底，就算貴都要追番多少用嚟責吓倉，所以我叫散戶有貨不妨睇定先食就係咁解。
陸羽仁
上一頁 下一頁
金融High Tea 舊文
