由收水到加息
2013/12/24 上午 07:48:18
網誌分類: 經濟
預祝各位有一個投資豐收，心情靚靚嘅聖誕節！
美國第三季GDP年度化增長4.1%，好過市場預期的3.7%，第二季GDP增長2.8%，亦好過預期，不過，要留意的是當時推高GDP增長的主因係美企加大庫存，唔係由實質的經濟改善推動。而第三季的推動力則主要來自強勁的零售銷售及外貿。美國個人銷售期內由1.4%增加至2%，單係這部份，已經提高了GDP增長40點子。基於美國的GDP，有七成係由零售銷售，這方面有明顯增長，反映美國經濟復甦有實質的支持。經濟有實質性改善，自然叫投資者振奮。
蘋果宣布與擁有7.6億用戶，全球最大的電訊商中移動達成銷售iPhone 5的協議。市場估計iPhone 5的銷量可以增加2000萬至2500萬部。蘋果昨日股價勁漲3.8%至570美元！亦帶動科持股造好，Google,Oracle(甲骨文) 及Intel齊漲超過1%。Facebook及Twitter更大幅抽高4.8%及7.6%。推動美股昨日第三日向上，再創收市歷史新高。杜指升73點至16295點，標普500指數漲10點至1828點。
這幾日的股市表現，對分析界來說，上周又係一地眼鏡。絕大多數的分析師，包括股神巴菲特，都認為聯儲局嗚鎗收水，美股以至全球股市唔多唔少都會受到衝擊，嚇到投資者有得震無得瞓。結果係聯儲局上周三終於決定開鎗，減少泵水100億美元，大市不但無跪低，當日仲刷新歷史新高，杜指少有地大升292點，其後兩日亦都唔見回調，標普500指數全周勁升超過3%。
聯儲局開始收水，已無懸念，市場的注意力開始落到聯儲局幾時會開始加息。有一派認為聯儲局會在完全結束量寬(QE)後，開始加息。估計聯儲局每次召開議息，都會順帶削減買債100億美元。明年聯儲局會有8次議息會議，大約會於10月時完全終止QE3，之後宣布加息。
另一派分析則認為好難估計何時開始加息，因為聯儲局曾經講過「會於美國失業率跌低過6.5%一段時間後才加息。」「一段時間」究竟係幾耐？冇人知道。分析員估計失業率6%會係一個分水嶺。按現時美國經濟增長進度，到2015年，美國失業率都未必能夠降至6%樓下。因此估計聯儲局最快都要在2015年底或以後，才可能會加息。
不過有分析員指出情況未必係咁。因為如果政府不盡早通過延長失業救濟期限的法案，將有好多人被剔出失業名單之外，勞動力的參與率將大幅降低。失業率亦會隨基數縮小而降低。
據摩根大通的首席美國經濟分析師估計，失業率會因此而減少大約0.5個百份點。即係話，隨住美國經濟的改善，用現時勞動基數的7%失業率計算，至2014年底，失業率已經跌到6%(勞動參與齊不變的話，仍然係6.5%)，去到聯儲局要加息的分水嶺。
果真如此，將打亂了聯儲局的原來計劃，可能要提早好多加息。加息勢將衝擊股市，經濟未係咁壯旺，甚至未完全復甦，經濟都可能打殘埋。實際後果係點？就好難預料啦！
陸羽仁
回應(0) 我想回應
陸羽仁 BLOG 舊文
