割禾青
2014年01月23日
外圍市況轉弱，港股跟隨低開79點。但在人行放水、A股沖喜帶動下，恒生指數開市不久即扭轉跌勢，兩萬三關失而復得；不過，股民焦點唔係指數上上落落，而係早排強勢的濠賭股板塊，有大行出嚟唱生晒，舞上舞落諸多動作。
濠賭股前陣子在券商一再唱好下升到唔識停，昨日摩根大通出報告警告該類股份下跌機會大過上升，濠賭股昨日全線捱沽，正係神又佢鬼又佢。銀河娛樂(027) 失守80元大關，大插5.5%收報76.95元，金沙中國(1928) 挫4%，為表現最差的兩隻藍籌；美高梅中國(2282) 跌6.5%。新濠博亞(6883) 開報126.8元創上市新高後，最終亦要跌4%。
濠賭變咗概念股
仲有一個星期就係春節，屆時是內地客去澳門的高峰期，大行呢個時候出嚟唱淡，好明顯有提早割禾青味道。早排濠賭股炒到癲，最先係優質股份好似銀娛、金沙大幅炒上，跟住到二、三線賭股，之後連疊碼仔股都炒。上個星期，炒家炒到連持有賭股權益的嘉華國際(173) 同信德(242) 都大幅炒上，說明炒風去到幾盡。
濠賭股炒咗一輪後，優質股好似銀娛，市盈率就算經過調整都去到43倍，金沙仲去到50倍，去到咁高水平，就算未來盈利增長幾強勁，呢類股份都變咗係概念股，唔係單睇短期數字去落注，而係你信唔信佢明天會更好。講到信唔信，大行就有好大操控空間，春節後會有博彩數字公佈，但點增長先叫符合預期呢？演繹權就係邊個錢多邊個話事，係咁情況下，好多人心態都係賺咗咁多，點解過年前唔計吓數字先呢？於是大行一吹，股價就跌咗落嚟。由於唔知而家股價係咪短期見咗頂，股民賺開錢，手頭有貨唔怕坐鎮先，但如果無賺過錢想撈底，就要小心好易暈浪啦。
至於大市，由於內地股市繼續炒放水，港股連續兩日國指好過恒指，恒指全日收報23082，升49點；國企指數收報10326，升108點，成交金額較周二增約一成至714億元。相對之下，A股表現仲搶眼得多，上證指數升43點報2051，深成指數升227點報7820，幅度近3%。內地股市暫時無乜好消息，主要靠放水推高，睇吓呢個效應係咪可以撐到農曆年前嘞。
內房春節前炒番轉
由於內地拆息回落，加上房產稅立法進程或較預期慢，受壓已久的內房股紛紛翻生。兩大龍頭兼藍籌中國海外(688) 及華潤置地(1109) 分別漲2.56%及2.29%；恒大地產(3333) 、世茂房地產(813) 更4、5%。雖然昨日表現不俗，但內房股普遍仍處於相當低位。假如內地春節期間的新盤銷情理想，唔排除新年過後內房股有機會再升一浸，現時可以發掘下優質內房收集定等過年。
夜店第一股Magnum Group(2080) 今日掛牌，暗盤市場收報2.8元，較招股價1.5元高87%，最高曾造3.12元。暗盤總成交1370萬股，涉及金額3880萬元，每手不計手續費賺2600元。
該股一手中籤比率1%，認購750手才可穩取一手，散戶咁難中籤，有人話不如留意係同一大股東打骰的耀才證券(1428) 好過，畢竟近日新股咁熱，經紀行做「孖展」生意有得執，本地證券股都係贏家，耀才股價最近已抽高一成，顯示識咁諗的醒目資金都唔少。
陸羽仁
金融High Tea 舊文
