借勢唔係做人世
2014年01月03日
昨日為港股踏入2014年後的第一個交易日，在此先祝各位股友新一年旗開得勝，個個賺到笑。講番個市，恒指昨日雖然順利紅盤高開高收，惟全日走勢先高後低，全日僅升33點，收報23340點，唔算話表現好好。
阿里概念有得炒
關於昨日個市，2014年首個交易日開市唔係咁靚仔，國企股壓力未消。有人安慰自己，話大型上落市，可以炒股唔炒巿啫。按照呢個思維，咁當炒主題有甚麼？中環茶友自問自答，其中一個係阿里巴巴上市。臨近年尾，阿里來港上市之風再吹，好多人仲寄望甚殷，相關股份紛紛炒起過年，其中一隻係去年上市的擎天軟件(1297) 。
阿里同騰訊(700) 成為本地科網股的精神領袖。騰訊股價高處未算高；阿里概念則勝在似有還無，故此公司未上市，個別被視為有連繫的股份都炒上，包括管理層曾經與阿里創辦人馬雲有淵源的擎天，同近日在物流業合作的海爾電器(1169) 。
中國擎天軟件為中國應用軟件產品及解決方案供應商，服務對象包括中國的政府機構部門及企業，但股民更感興趣是公司股東之一是阿里巴巴。擎天在去年阿里上市唱得最熱時招股，一度大受注目，股價不受涉及商業糾紛拖累，一度大幅爆上，其後阿里上市之說轉趨沉寂，股價輾轉回落。最近阿里上市再有憧憬，股份趁勢炒上，是典型炒概念玩法。
至於海爾主要係炒同阿里合資做物流。海爾近年大力拓展網售，旗下的日日順物流近年開始打開三、四線城市，以至鄉鎮市場，獲得阿里青睞，齊齊合組公司。
海爾與阿里合作，獲大行普遍唱好，花旗認為合作可以令海爾保持強勁增長，提升目標價至25.6元，由入股到依家，海爾股價已上升接近40%。現時海爾市值578億元，市盈率25.5倍，息率跌到只有0.4厘，估值已經唔平。
下一波興物流股
由科網股掀起的投資潮似乎未停，下一個目標可能係擴散到物流概念股。係年底由嘉里(683) 分拆上市的嘉里物流(636) ，係區內大型第三方物流公司，同樣估值都唔平。由於物流業需要投資不少，估計好多公司會趁股票有價上市集資，用嚟做大做強，投資銀行有銀可搵，都會有興趣大合唱。
做物流同做科網唔同，科網係賣技術同概念，做物流係薄利生意，兩者雖然互相倚賴，但營運模式唔算太似，但炒股有時只係借勢，唔係做人世。如果有人叫你投資物流生意，你要諗吓回本期會唔會太長，利錢會唔會太薄，但如果用同一個標準去睇物流股，好多都已經唔抵買，不過，係投資世界，基本因素好多時只係用嚟參考，依家最重要係有無大戶帶頭去炒。
陸羽仁
金融High Tea 舊文
