愈爆愈璀璨
2014年01月09日
呢鋪港股有較像樣反彈，主要係兩大強勢板塊濠賭股同科網股燒煙花，股價爆上，仲愈爆愈璀璨，再加埋零售股，終於帶動恒指威番次。
強者未升完 弱者未跌完
濠賭股同科網股近月勁到無朋友，勇猛的銀娛(027) 升勢無得擋，上日升完6%，昨日再漲3.4%至78.1元。科網股最勁隻雲遊(484) ，升咗8.45元，升幅有成15%；龍頭騰訊(700) 都升7.5元，幅度就差啲，只有1.5%，但已經迭創新高。喺兩大強勁板塊支撐下，恒指一度爆升300點，係最似樣的一次反彈。依家大市喺100天線(23016) 阻力不輕，恒指尾市回順，收市最終升幅放緩至不足三百點。恒生指數收報22996，升283點；中資股始終弱啲，國企指數收報10329，升93點，成交金額由昨日的617億元，增加至760億元。
恒指升得咁勁，後市係咪一帆風順呢？初步睇似乎就未必，中環茶友形容，而家市況係愈跌愈墮落、愈爆愈璀璨，簡單講即係強者愈強、弱者愈弱。強者係濠賭同科網，兩者升到七彩，睇嚟雖然風險隨累積升幅不斷增加，暫時仲唔似玩完；弱者就係內銀同內房股，同樣呢個大板塊受大氣候衝擊的影響仲未消散，係有升有跌下，個市唔似可以一口氣升上去囉。
雖然個市未必即時大好，但經過年頭急跌，個市似乎有初步穩定跡象，有反映大市動向作用的「路邊雞」股份地產分類，開始有喘定跡象，除了龍頭股企穩外，仲見到新地郭氏家族由主席郭炳江和郭炳聯入市，兩人於1月3及6日，合共增持新地106.6萬股，每股平均價96.138和96.459元，涉資1.03億元。恒地(012) 主席李兆基，就於1月3日增持26.8萬股公司股份，每股平均43.896元，涉資1176萬元，佢哋出得嚟買貨，至少心理上帶來支持。
另外，個市多咗其他股份有炒作，喺農曆年內地消費旺季展開下，多隻零售股近排呢兩日更係逆市暴炒。繼野村及花旗上日唱好，包括達芙妮(210) 、安踏(2020) 及百麗(1880) 。
消費股只宜食時令
德銀及美銀美林昨日接力推百麗，齊齊給予百麗「買入」評級。達芙妮昨日勁抽16%至4.44元；百麗不遑多讓。百麗上日公佈去年第四季內地零售數據，期內鞋類業務同店銷售增長只有1.3%，業績表現麻麻，運動服飾業務就好一些，同店銷售增長則為5%。
百麗去年新開店舖數目按年升9%，擴張步伐遠低於12年的14%，主要係非必需品行業第四季表現差過預期。由於內地經濟放慢，加上網上銷售的挑戰，美銀美林及德銀都預期百麗今年同店銷售將轉為持平甚或輕微下降。
美銀美林下調百麗今年盈利預測6%，目標價由13.5元下調至11元。不過百麗手持巨額現金，估計派息比率會提高，最近三個月股價已下跌約兩成，現價相當於市盈率13倍。
百麗升勢由去年12月17日已經開始，當時的股價係8.59元，至昨日已經升近16%。不過，比起去年今日接近17元，股價已經大跌超過四成，近排只係食住購物旺季條水反彈一下而已。達芙妮就更加大劑啦，同期股價更係大跌了五成六，跌得多些，近期反彈力度大些，故此暫時睇嚟呢類股份都係炒吓旺季因素，唔係太適宜同佢談戀愛。
陸羽仁
金融High Tea 舊文
