另眼看賭股
2014年02月19日
美股上周五又升，但人行突然進行480億元人民幣14天期正回購操作，內銀股普遍受壓，搞到大市氣氛窒住窒住。東亞銀行(023) 業績表現勝預期，主席李國寶仲被問到會否賣盤，仲開出市帳率3、4倍的天價，等如間接拒絕賣盤。藍籌業績公佈有個好開始，相信短期大市會繼續睇住業績嚟炒。
藍籌股首先派成績表的東亞，中午公佈去年純利為66億元，按年增9.2%，高過市場預期的55億至64億元，每股基本盈利按年增2.2%。由於業績較市場估計勁，股價午後升幅擴大。大市午後轉為好淡爭持，尾市於好友推動下，挨近全日高位22592點收市，高收51點，成功造出三連升；國企指數跌43點。
農曆年過後，本來兩大強勢板塊科網同濠賭股，似乎開始分出高下，科網強勢持續，濠賭則開始有腳仔軟跡象，幾隻龍頭股都無再挑戰新高。剛巧有濠江老友過來飲茶，佢喺澳門街係知情人士，自然問吓佢澳門博彩業情況。
賭牌2015年檢討
澳門街老友話，1月份澳門博彩成績叫做不過不失，究竟基金滿唔滿意就見仁見智，家當地關注焦點，係未來賭牌續約安排，澳門特首早前透露，會係2015年展開檢討，屆時就會有細節出街。
現時澳門六間賭牌公司全部上咗市，同小股東有鑊齊齊孭，陸羽仁話，照咁計，澳門政府唔會搞大動作唔續牌啫？澳門街老友話，條數係咁計，早前有人建議增發賭牌，呢樣嘢涉及不少考慮，好容易順得哥情失嫂意，不如一如舊制六個牌好過，反而係續牌續幾耐，就係課題之一啦。
澳門第一次增發賭牌，一發就二十年，原因係當時除了澳博外，個個都係新仔，要投資基建同軟件，唔俾番咁長時間佢，根本無可能投資，家持牌公司間間上晒市，市值個個講緊成千億元，博彩設施好多都落成，喺咁環境下，仲需唔需要俾你一次續牌就廿年，或者十年呢？講得白啲，賭牌係高速印鈔機，批俾你印銀紙，你嫌時間短咪唔好要囉。對於澳門政府或中央嚟講，仲使唔使一次過就話明印足二十年先？
老友話，續牌問題唔淨止係澳門街的事，仲涉及中央，家持牌公司，有近一半係外資，其中最多係美資，故此續牌條件唔單止係涉及澳門政策，都要睇中美關係，咁點解要一次就批出長約呢？呢樣嘢就要研究吓囉。
中美棋局有影響
聽澳門街老友講，續牌時間長短係考慮，咁究竟係咪一定縮短時間，如果縮又縮短幾多？家未必有定案，仲要研究吓，可能仲牽涉不同力量喺度發功。本來，六大賭牌公司個個都變成大隻佬，要挑動佢哋唔係咁容易，發牌時間長短似乎唔係咁重要。不過，家賭牌公司好多仲係處於發展階段，要同銀行借錢，假如續牌時間唔長，貸款風險同條件自然增加。簡單啲講，家賭牌公司市盈率40倍，即係話盈利不變的話，要四十年先收回成本，假如賭牌只係得十年或更短，咁估計會唔會受影響呢？銀行放貸同還款會唔會減短呢？如果融資條件不同，大股東就要考慮不同途徑搵錢，包括是否從市場集資等，呢啲政策因素，喺股價低時唔係咁重要，喺股價高時睇法又唔同，所以澳門街老友的分析唔一定會發生，佢唔係做緊股票分析，但就畀到我哋睇到研究濠賭股遠景同估值的另一個角度。
陸羽仁
金融High Tea 舊文
