魚樂無窮：新經濟股幾時撈底？ - 唐牛
■昨日恒指明顯靠中移動同長和系托住；圖為長和系主席李嘉誠。資料圖片
周初提過新經濟股有少少辳味，加上累積升幅大，獲利盤可以沽得好凶狠，結果好嘅唔靈醜嘅靈，科網、手遊、環保、新能源噚日全線失陷，跌幅逾一成比比皆是，部份更加係一沽到尾，孖展斬倉味道甚濃，完全冇提供逃生機會。指數明顯用中移動(941)同長和系托住，騰訊(700)、銀娛(027)、金沙(1928)成為大戶提款機。
通街平貨，究竟幾時先係撈貨時機？唐牛認為日線圖出現陽燭，係其中一個指標，有埋成交配合就更佳，證明開始有承接力。不過，戰友緊記，現階段出手接刀，只能用投機心態，始終大勢明顯有變，唔再係之前大漲小回格局，所以短線有食要食，更要嚴守止蝕。
腥風血雨下，能夠逆市升嘅，肯定有番咁上下實力，彩星玩具(869)係其中一員。日前公佈全年業績，一如預期靚仔到暈，收入大增3.5倍至16.6億銀，盈利爆升11倍至5.3億銀，毛利率由60.3%擴闊至62.8%，最重要係宣佈派息共0.15元，息率高達4厘。集團表示，第二輯忍者龜開播後，每一集都喺首播時段榮登收視之冠，熱情有增無減，重頭電影將於暑假上映，加上產品將於今年上半年闖華，催化劑十足，現價市盈率僅8倍，喺動盪市況中，不失為一個好選擇。
唐牛
上一則: 滙海探戈：商品孖寶一時瑜亮 - 奇兵
下一則: 股場放大鏡：大昌行或炒賣盤消息 - 歐陽風
魚樂無窮 - 唐牛 舊文
