母愛真偉大
2014年03月28日
港股臨結算前先跌後力撐，不過，戰況唔可以只睇指數咁簡單，因為大市靠啲跌到殘的中資股好似中移動(941) 頂住，之前炒到七彩的科網股繼續調整，仲有就係濠賭股呢兩個星期有潰退跡象，有股在手的投資者要提高警覺嘞。
網企掟貨一樣跟紅頂白
喺內地繼續正回購收水兼缺乏火車頭下，港股都仲掙扎想企穩，全日反反覆覆，恒生指數收報21834點，跌53點；國企指數收報9873點，升23點，成交金額881億元。大戶似乎仲想喺結算前死頂個市，但食粥食飯都仲係睇要外圍生唔生性。
網企概念股回調插得咁急，除咗大股涉及基金大戶操作外，二、三線咁波動，反映好多散戶埋堆炒作，擺明同買貨一樣，都係跟紅頂白，見到有唔妥就鬥掟離場，照計咁樣唔係壞事，至少反映股民仲有理智，保持到風險意識，反而濠賭股呢排一浸浸落，俾人感覺有點不安。
大市如果唔係有中信集團借殼中信泰富(267) 整體上市兼來港做總部，氣氛可能仲差。中信集團注資近三千億元入香港掛牌的上市公司，資產值差不多等如公司市值的五、六倍，呢次蛇吞象仲被形容為國企改革的新一浪。外界講到今次安排有示範作用，股價最多升近三成，收市升一成多啲，市場反應初步算係叫做OK。
中信泰富當年挾着國務院直屬機構的旗號借殼上市，曾經有過雄心壯志的日子，可惜，2000年美國爆發金融海嘯前，公司做咗兩個好錯的大動作，一個係收購澳洲的磁鐵礦；仲有就係因為投資澳洲，順手大買澳元掛鈎的衍生票據，變相賭起外匯上嚟，結果海嘯一爆發，先係澳元衍生工具輸大錢，搞到要阿媽出手相救；不過噩夢仲未停止，跟住澳洲鐵礦不斷爆發問題，遲遲未能投產，成為無底黑洞。有熟悉公司情況人士話，假如今次不是阿媽再出手，單靠中信泰富真係唔知點應付如山的債務，所以阿媽今次奮身借殼，變相第二次打救佢，從呢個角度睇，小股東可以話壞事變好事，算係執番身彩。
上市招股難 借殼兼救仔
中信集團捨身救阿仔，除咗顯示母愛的偉大，仲有無其他啟示呢？中環茶友話，今次注資被包裝為國企改革新一代，呢個理解又唔可以完全話無譜。
睇番今年新股市場認真麻麻，不少新股掛牌破底，強如中信文化，呢兩日都係招股價左右載浮載沉，中信若要整體上市，要搵包銷同搞熱個場，吸引到足夠的捧場客，花費的資源同精神都唔會少，而且仲有好多不明朗因素唔可以確定，既然點都要嫁人，不如幫吓個百厭仔好過。
茶友話，本來今年新股市場有兩齣大龍鳳，一齣係阿里上市，仲有就係屈臣氏掛牌，班投行大哥同輪神老早擸定「架生」等開飯，點知兩單大「刁」先後變卦，大家等米落鑊，家中信搭個場出嚟，市場已經傳緊佢會引入主權投資基金如中投及淡馬錫，希望佢做得好好睇睇，可以幫補吓大家啦！
陸羽仁
金融High Tea 舊文
