中環在線：互聯網思維賣小米雷軍心中冇價格戰 - 李華華
■雷軍用互聯網模式「一上來就免費」賣小米。互聯網
有「中國蘋果」之稱嘅小米一向以平價殺出血路，小米老闆雷軍噚日自爆，以「互聯網思維」經營呢盤生意，「互聯網從不打價格戰，因為他們一上來就免費」，因此，小米冇諗過打價格戰，一開始就以成本價賣產品。
小米越來越受市場歡迎，本港唔少電訊商都爭住跟小米合作推出手機。雷軍今年初應邀參加總理李克強主持嘅座談會，更被對方笑指「小米成了大米」，可見小米幾咁有人氣。
明年冀賣1億部小米
雷軍噚日喺深圳出席一個研討會就透露，今年首季銷售額較去年同期增長1.5倍，如果全年保持呢個增幅，今年有機會做到800億元(人民幣．下同)嘅生意，若增幅持續，明年生意甚至係過千億元。
雷軍之前講過，今年至少出4,000萬部手機，原來首季已經出貨1,100萬部，照情況，全年有機會做到5,000萬至6,000萬部，明年目標係1億部。
佢認為，公司成立4年有呢個成績，最重要係以互聯網思維去做手機呢盤生意。
講到互聯網發展，佢算係首批受害者，因佢1988年創辦金山軟件，互聯網最先就係砌底軟件行業。佢之後苦思死因，發現互聯網係思考模式嘅改變。
互聯網公司最緊要講口碑，於是，小米喺頭一年半極低調，唔賣廣告。雷軍憶述，小米最初發佈手機，有同事拎咗一個價值3,500萬元嘅廣告預算畀佢睇，佢拎起就撕爛了，反問能否一分錢不花，單靠口碑就將小米拓展開去。
既然用互聯網思維，咁根本就冇打價格戰嘅概念，因為互聯網一上來就免費，所以小米手機一直以平價招徠，又慣性以限量限時網售製造「秒殺」現象。
李華華
mailto:LiWaWa@AppleDaily.com
上一則: 樂香園：傳統電視末日 - 密西比
下一則: 中環在線：阿里唔嚟香港李小加照撐 - 李華華
中環在線 - 李華華 舊文
