改革紅利 逐步現身
2014年03月31日
港股到季尾炒一炒，強股如科網股唔掂，弱股特別係紅色股卻反彈得幾厲害，內銀股借住業績唔係咁差，股價一夾而起，打頭陣的農行(1288) 、中行(3988) 及工行(1398) ，業績符合巿場預期，帶動港股回暖，恒指上周五於重上兩萬二點大關至22066點，全個星期大漲628點，漲幅接近3%；國企指數仲勁，勁升574點或6.1%至10001點。
農行率先於上周二派成績表，純利增長14.6%至1663億元(人民幣，下同)，每股盈利0.51元。每股派息0.177元。其中營業收入增長9.6%至4658億元，淨利息收入增長10%至3762億元。淨利息收益率2.79%，淨利差2.65厘，均較上年下降2個基點。不良貸款率由1.33%降至1.22%。
一日後中國銀行派成績表，2013年純利1569億元，按年增長12.4%。綜合證券商觀點，中行2013年業績最大亮點在於，淨息差水平按年增加9個基點，達到2.24厘。同時，2014年歐美地區經濟的弱復甦，將繼續帶動海外業務的回暖。
海外業務 帶起中行
跟住輪到工行業績出爐，純利升10.1%至2626億元，每股盈利0.75元，派息0.2617元，高過對上一年的0.239元。工行年內利息淨收入升6.1%至4433億；手續費及佣金淨收入增長比較多，升15.3%至1223億元。淨利息差和淨利息收益率分別為2.4厘和2.57%，均按年下降9個基點。不良貸款率0.94%，與去年差唔多。
除了三大行外，細間少少的商業銀行招商銀行(3968) 公佈去年純利517.4億元，升14.3%，優於預期；每股盈利2.3元，派末期息0.62元。招行去年全年淨息差為2.82厘，收窄21個基點。
唔好怪我畀一大堆數大家睇，若然你買呢啲股票長揸，真係要睇更詳細的數字。簡單總結已公佈業績的大型內銀股，去年純利有10%以上增長，算做相當唔錯，雖然長線前景受壓，但短期仍在賺錢。
中金公司比較工行、建行、農行和中行，話中行的基本面在四大行最佳。中行受惠於內地外幣和海外業務，淨息差水平雖然低，但淨利息趨勢卻在四大行中最佳。2013年第四季度集團層面淨息差環比擴大11基點，主要受惠於內地外幣和海外業務。中行受惠於海外經濟復甦，帶來外幣業務淨息差回升，預計中行整體淨息差趨勢，在未來仍將持續優於工行和建行，中行相對於工行、建行的估值折讓將會收窄。即係話中行可以睇好少少。
曾幾何時，四大行中，中行最被睇淡，皆因它有部份海外業務，息差較少，風險較大。如今歐美復甦，中行竟因海外業務被睇好。中行現價3.4元，5.5倍市盈率，息率6.4厘，公佈業績後已經急彈。
內銀宜短 炒吓波幅
正如我成日講，內銀長線怕佢唔得，但係短線另計。乜嘢叫做長線唔得，有啲朋友買係月供，諗住揸10年、8年，甚至靠佢過世，平時唔去睇隻股，盲買長線，唔睇唔理，公司面對的經營環境變晒都唔知，用咁嘅態度買內銀長揸，就有風險。好似中移動(941) ，佢面對緊微信等新通訊工具的挑戰，盈利首次下跌，未來唔咁睇好，現價9倍市盈率雖然亦唔高，但好有大笨象等住被人圍攻的感覺。阿爺話到明內銀暴利，講明利率要市場化，佢哋面對的政策挑戰更明顯，所以投資者更驚，市盈率更低。
好似工行咁，上星期五收市4.72元，市盈率只有5.6倍，真係低殘價。工行2006年10月下旬上市，招股價3.07元。揸住佢近8年咁長，只係升咗53%，另加每年大約3、4%息，講收益相當有限啦。值得留意嘅係工行上市時，市盈率高達22倍。工行年年盈利有雙位數增長，但係股價偏偏唔升，市盈率由22倍跌至家嘅6倍唔夠，究其原因係外資睇淡內銀前景。買股等如買夢想，講前景，內銀股畀唔到投資者前景，股價就無大進帳，不過，短炒唔同，跌得多，梗會反彈，買入走吓波幅，又唔係唔得。
拉闊少少講，中資股大勢的好壞，與阿爺的政策好有關係。我上星期寫了篇文章，講阿爺壓低人仔匯價救市。文章出街後，唔同人有唔同解讀，有人話我睇好國企，又有人指我睇淡人仔，有唔少人走番嚟問我真正點諗。其實，我想講嘅主要係阿爺開始出招用壓匯價救市，對中資股的前景唔好睇得咁淡。當外資開始唱淡中國經濟的時候，我有逆向心理，反而開始睇好大市中線前景。
國企引資 吸引眼球
上兩個星期，高盛將中國今年經濟增長，由原本預測的7.6%下降至7.3%(官方預測是7.5%)。但摩根士丹利睇得更淡，預計在未來兩年內，中國經濟增長將由7.7%大跌至5%，出現所謂「明斯基時刻」，此名稱以新凱恩斯主義經濟學家明斯基的名字命名。明斯基認為，隨着市場上投機性信貸和龐氏信貸的增加，金融體系因避險而收縮信貸，經濟就會急跌。
我覺得大摩睇得過淡，中國經濟的確有佢講的問題，但正在調整改善，中國又開展新一輪的改革，推動大型國企引外資或民間資金入股，進一步市場化，中信泰富(267) 用2800億收購阿媽中信集團的資產，就是中信集團引入外資改革的過程，未來有大量國企進行這種改革時，就會出現改革效益，亦即係所謂改革紅利，更會引起外資投資者的注意，到時佢哋又唔會睇得咁淡。
我預測內地股市中期會反覆向上，大家留意啦，我講嘅係反覆向上，唔係直線向上，意思係內地股市和香港紅色股，早前跌咗咁多，家反彈中，彈得得咁上下，又會唞唞氣，但大趨勢係向上，手上貨少者，又係那種睇半年以上的中線投資者，要趁回吐吸納，當然升得太急又唔好追。
至於我對人仔匯價的睇法，也需要講多兩句。有人話睇完我篇文章，覺得人仔前景好淡，要即刻甩晒手上嘅人仔，甚至要沽清手上所有內地資產。我嘅睇法其實唔係咁，我認為人仔匯價中短線睇淡，但長線仍然是可以的。
人仔匯價 長好短淡
我向來都唔贊成將錢放在銀行長期定存收息，即使人仔有3厘息，比港幣存款高。比較好嘅做法係等個市跌得咁上下嘅時候，買股票，等佢反彈到有相當收益時沽出，回報率遠好過在銀行收息。這是我個人對投資的基本睇法，與大市走勢無關。若然再加上短線人仔匯價唔一定升的分析，人民幣存款更不吸引。
不過若講對人仔匯價的睇法，我會覺得人仔中短期唔得，長期還可以。有位熟知內地人民幣匯價走向的金融界猛人，同我講解過內地人民幣匯價變動的整個狀況。猛人解釋，阿爺在去年第四季開始，已經想壓低人民幣匯價，因為匯價升得過急，會對經濟造成壓力。外匯流入令人民幣匯價升值，外匯流入的方式是貿易盈餘(經常帳)，加外資直接投資淨額(資本帳)。
內地去年的貿易盈餘大約2000多億美元，外資直接投資淨額1000多億美元，加起來外匯盈餘3000多億美元。但阿爺全年買了等值5000億美元的外國資產，買凸了1000多億美元資產，借此間接推高美元、拉低人仔匯價。據猛人分析，這種做法只「做得一時，唔做得一世」。只要中國經濟維持向上，經常帳及資本帳維持着比較大的盈餘，通脹又唔係好高的話，人民幣匯價就有向上的壓力。中國經濟長期而言，向上係大趨勢，外匯不停流入中國，人民幣匯價長線也只能向上。阿爺干預得一時，唔干預得一世。除非中國出現大摩所講的「明斯基時刻」，咁人仔匯價應該大跌，否則長線仍睇升。
所以，假若你買了中國資產，例如內地樓，你又係睇五年至十年的長期回報，對於人民幣匯價，就毋須擔心啦。短期而言，阿爺正在壓抑人民幣匯價，你走去做人民幣存款，就無乜着數。不如等國企股下一浪回吐時，低啲買國企股，回報會仲好。
陸羽仁
金融High Tea 舊文
