龍頭屋苑回落
2014/3/3 上午 09:22:00
網誌分類: 經濟
我好關心樓價，因為樓市得唔得，都影響本地消費，雖然而家消費有自由行頂住，但樓市唔好，貴價消費行業始終會受影響。
在政府隻辣招稅通過之後，業主連最後一個希望都無埋，想賣樓的唯有減價，呢個週末陸續有貴價樓減價出貨的消息。
港島區龍頭屋苑太古城最有指標性，太古城最新一宗注目成交係高層海景優質戶劈價兩成賣出，出售的單位係高安閣高層C室，建築800方呎，實用701方呎，原本叫價940萬元，但放盤兩個月未賣出，上周六減至858萬元沽出，實用呎價僅12,240元，較銀行估值972萬元平一成以上。
這個成交較去年5年質素接近單位售價平約兩成。去年5月恒星閣高層C室單位沽出，同樣園景有少海，當時以高價1,090萬元出手，實用呎價高達15,181元，一睇就見到呎價比上週六成交單位高好多。上述高安閣高層是較優質單位的成交價，若以平均價計，太古城上月實用平均呎價13,643元，較去年2月歷史高位14,435元回落5.5%。
雖然我覺得地產經紀傾向唱衰樓市，希望業主減價促進而家疲弱的成交，但都認為太古城高層少海單位都要較高峰低兩成才可以交易，證明樓市開始下跌，而且係貴價樓先跌，因為跌市先走避的是買樓價樓的買家。而家好多過去三年買了新盤貴貨的業主，想沽要平好多先走到。樓市淡，大多數業主唔肯減價，買家又怕跌唔平唔敢買，變有價無市，但叫價無大跌但無成交，無指標作用，要成交到的盤才可以計。總的而言，樓市有繼續下跌壓力，對其他行業、特別是貴價本地消費有壓力。
美股標普500指數上星期五一度再創新高，當日中午曾刷新歷史新高，但後勁不濟，近尾段曾倒跌，臨收市才反彈，升幅由全日最高的0.6%收窄至0.3%，升5點至1860點，杜指收報16323點，升51點納指逆市跌0.3%。標普500指數2月份勁升4%，至上周五收市，已收復1月下跌的失地，較上年有0.6%進賬，納指2個月累計升3.2%，最弱係杜指，仍較去年低1.5%。
美股當日係受到利好經濟數據刺激。2月芝加哥採購經理人指數(PMI) 意外地由上月的59.6攀升上59.8點，遠好過市場預期的下跌至56。密執安大學公布的2月消費者信心指數亦由上月的81.2升至81.6，只係輕微低過預期的81.8。接受調查的分析師平均預計該指數將從81.2攀升至81.8。另外，1月二手房簽銷量增長0.1%，也略好過市場預期，但仍處在接近兩年新低的水平。不俗的經濟數據，使投資者覺得美國經濟近排唔係幾得，好大原因係受到惡天氣影響，係一個短暫的因素，大市造好，標普500指數創新高。
不過，當日大市升勢無以為繼，下午更急速滑水見紅。由於去年第四季的個人消費增長率從3.3%驟降至2.6%，遠差過預期的2.6%，美國政府將第四季經濟增長(GDP)由原來的3.2%大幅向下修正至2.4%，打擊了投資情緒。
最嚇怕投資者的是烏克蘭政局不穩的消息不斷傳出。俄軍藉口保護俄羅斯在烏克蘭克里米亞俄語區的利益，派兵進駐克里米亞，烏克蘭臨時政府亦向俄國發出嚴厲警告，打仗的味道愈來愈濃，股市最怕呢味，股市恐懼指標VIX指數亦隨之抽升至14點上方，投資者的即時反應就係收回資金靠邊站，大市當然無運行啦。
陸羽仁
回應(2) 我想回應
陸羽仁 BLOG 舊文
