投機酷派
2014年03月03日
買股買前景，好多人問起我匯控(005) 和中移動(941) 點解股價唔升，仲要有向下feel，我答謂其實唔使睇業績都知，市場擔心佢哋前景唔好。
匯控呢幾年靠裁員節流製造盈利，生意不前，節流唔可以永遠咁節下去，所以一兩年前市場見盈利回升炒了一浸，慢慢睇到佢在生意層面無以為繼，股價就謝番落去。今次公佈業績不理想，壓力更大。
中移動的局面差不多，佢本來做手機網絡商獨市生意，獲利甚深，但後來引入聯通(762) 和中電信(728) 兩個競爭者，在3G推出時先打一輪減價戰削弱利潤。到後來微信興起，首先殺死中移動的短訊生意，後來微信逐步推話音留言、對講機，到話音通話，根本一步步扼殺中移動利錢深厚的跨省長途電話生意，變成騰訊(700) 愈炒上，中移動愈衰。今年內地推4G，唔知中移動食到幾多，若然推4G都盈利不前，就真係無眼睇啦。
股市賣夢 前景為王
結論係唔理你家賺幾多，甚至純利仍然有增長都無乜用，只要投資者唔睇好你間公司未來的前景，你的股票都無運行。股票市場從來都係賣夢的地方，你無夢想可賣，做乜幫襯你？
講咗咁耐，你可能問我咁有乜股有夢可賣？我的確想講一隻︰手機股酷派(2369) 。若果大家記得，個幾月前酷派仲係三個幾時，有一個星期一，我都推介過佢一次，因為佢隻千元4G手機「大神」剛推出，好似幾得。講完後佢不斷升，上周三再獲高盛第二次推介，股價單日大升13%，如今已升到5.21元。佢現價比我首次講時已升近五成，但我仍覺得呢隻股可留意。
首先講高盛點睇。上周三高盛第二次再次給予酷派「確信買入」的投資評級，並再上調目標價近20%至6.1元。高盛在上月初首次發表報告將酷派列入「確信買入」名單時，將目標價由佢再早之前建議的3.1元，大幅上調至5.2元。當時高盛話，睇好酷派今年初推出低價4G手機的前景，佢分析酷派2013年的營運支出較高，下調其2013年每股盈利預測24%，但同時上調酷派在2014年至2015年每股盈利預測22%及26%，以反映酷派利用內地4G市場推出低價手機，增長前景更佳，並預期酷派到2016年的每股盈利為0.49元。這是高盛在上月初第一次話「確信買入」酷派時的預測， 當時酷派股價只是3元多。
但不到一個月，酷派股價升了上去，在上周時升到約4元多時，高盛一個月內第二次發表研究報告，除了重申給予酷派「確信買入」的評級，又再度上調酷派目標價，由5.2元上調至6.1元。高盛話，酷派率先配合中移動推廣4G手機，並通過電子商貿渠道銷售智能手機，市場目前對酷派的「大神」手機有求過於供的跡象。隨着酷派推出更多產品，其業務將持續增長。因此將酷派12個月的預測目標價，由5.2元上調至6.1元，上調酷派2014年至2016年每股盈利預測14%至22%。
高盛匯證 齊齊睇好
匯豐證券同時睇好酷派，將酷派的投資評級由原來「中性」升至「增持」，將目標價由3.2元升至5.33元，相當於佢預測酷派2014年市盈率13倍。匯豐證券話，中移動估計今年內地4G手機有1億部上台，酷派是最先推出1000元人民幣定價的4G手機供應商，因此會受其惠。
睇完兩個證券商的推介，但你見到酷派升咗咁多，都會相當忐忑，心諗升咗咁多，呢啲股點買得落手呢？要答呢個問題，首先要睇番酷派搞緊乜。唔講唔知，酷派原來係去年全球第7大智能手機供應商，唔係無名之輩。權威電子產品研究機構IDC近日發表報告，指2013年全球智能手機發貨量首次突破10億部，比上年增長38.4%。排第一的三星去年銷售3.1億部的智能手機，市場佔有率高達31.3%，蘋果iPhone以15.3%市場佔有率位居第二，蘋果雖然擁有第二大市佔率，但比重卻從2012年的18.7%，下降至15.3%。
酷派手機 全球第七
中國手機廠商表現搶眼，排第3的是華為、第四是LG、第五是聯想(992) ，三間公司的市場份額均不到5%。排第六的是SONY，排第七的就是酷派，酷派以去年全年3720萬部的出機量，躋身世界第七，佔全球市場份額達3.7%。其實看第三至第七的企業排名所見，各大廠商市場份額相差甚微，排名第七的酷派與排名第六的SONY，份額相差僅為0.1個百分點，與排名第五的聯想相差僅為0.5個百分點，與排名第三的華為相差亦只不過是1.2個百分點。在第三至第七位當中，華為、聯想、酷派都是中國公司。
另外，根據IDC和IDG於今年1月份共同發佈的「2013年度全球智慧手機十強」報告，酷派的排位是全球第八，去年酷派手機銷售增長128.8%，成為前十強中增長最快的企業。
IDC今年1月發佈的報告中指出，隨着智能機市場的急速發展，中國企業已開始成為國際舞台上的重要角色。儘管許多國家的智能手機市場在2013年都面臨飽和，但得益於新興市場對中低端智能手機的需求，智能手機和平板電腦仍在推動市場發展，來自中國品牌的智能手機，繼續保持了高速發展的趨勢。
踏入2014年，中國市場開始推4G手機，很有可能再度迎來一次全面爆發，內地業界估計酷派今年有機會打敗SONY，挑戰聯想或LG，躋身全球第五名。
千元手機 搶佔市場
今年是中國手機網絡商大推4G服務之年，光是中移動便估計自己有1億部4G機上台，這顯然是一塊大餅，也好像賽車的超車彎道一樣，是手機生產商一個不可放過的機會。所以酷派一來就推低價的千元手機，而不是先推貴機，賺一浸再推平機，這個策略令對手有少少意外。
按內地媒體報道，酷派董事長郭德英的盤算是：先行搶食。當年在3G智能手機時代，中華酷聯基本上就是靠千元平價機打開市場。如今4G時代來臨，也是老調重彈，郭德英認為，如果要想把手機產量做大，必須將價格定位在千元以內，依靠千元機快速搶佔市場，所以酷派的4G策略是在時間和銷量都要搶先，比其他廠商快三個月，連續推出了三款一千元4G手機。酷派副總裁曹井升認為，酷派能最快速推出千元以下價位的4G智能手機，依靠的是成熟的研發能力，加上酷派經過2G、3G市場十多年的競爭，形成了自己的資源優勢，包括在雙卡雙帶技術的積累和品牌認可度，亦有利快速推出產品。
酷派亦定出2014年銷售目標，今年推出30款4G手機產品，涵蓋高、中、低檔次，每月都有新手機上市。酷派同時將今年全球手機出貨目標提升至6000萬部，包括4000萬部4G手機，2000萬部3G手機。
紅海劇戰投機之選
講完酷派的好嘢，都要講吓衰嘢，酷派一出4G就出千元機，其實是迅速把藍海變成紅海，大大收窄4G這個新手機市場的利潤空間。而且酷派主要和小米的平價高質機對打，酷派出招後，小米老闆雷軍勢將還招，戰況必然慘烈。就利潤空間窄的問題，酷派副總裁曹井升話，酷派未來大規模的銷售，會攤薄成本。另外酷派將全力透過電子商貿渠道推機，以減低市場推廣及分銷的成本。
我認為酷派可以投機，主要是投機在它的生意上，投機它可以實現6000萬的年銷售，成為世界第五位的手機製造商。在去年全球三至七位手機商中，香港投資者可以買得到的只是聯想和酷派，聯想太大，市值861億，包含太多其他生意，概念不單純。另一隻手機明星是小米，同屬其老闆雷軍系的金山軟件(3888) 都炒到飛起，但雷軍講明兩年內不會將小米上市，所以小米得都唔等如金山軟件得。你睇金山軟件炒到312億市值，酷派只係110億市值，匯豐估酷派2014年市盈率只係13倍，以炒嚟計，酷派抵炒啲。
我話買酷派係投機，主要因為無人能確切講到未來中國手機市場係點，好似股神買比亞迪(1211) 咁，一樣係投機。投機其中一個控制虧損方式是控制注碼，若5.21元買酷派，預佢最差跌50%就沽貨投降(都要跌到2.6元)，特別係佢4G手機銷售唔得時先至走，你要問自己蝕唔蝕得起？較簡單的玩法係買少一點，就會蝕得起，若只佔組合一兩成，輸一半斬纜，等如組合唔見5%至10%，咁樣易頂好多。想追求刺激，炒酷派呢啲股就刺激啦，不過心血少者就唔好玩啦。
陸羽仁
金融High Tea 舊文
