異動空間：仲未入場應點揀 - 魏力
博反彈之難，在於如何在一片頹垣敗瓦中，快人一步搵出大戶掃貨對象。散戶資金有限，先掃邊個板塊？邊啲稍後先買？掃績優股先，定係撈殘股先？呢啲都係博反彈的成敗關鍵。隔晚納指勁彈1.8%，以為科網股會炒一浸，點知高開就冇力，軟件股更倒跌收場。如果開市追入，資金被綁之餘更失去掃內房股機會。
炒手機股呢？講氣勢一定揀通達(698)，點知資金like更殘嘅酷派(2369)，撲唔中的話又係白做。升得較全面只有支付股，上周五指環亞智富(1390)有機見底，三個交易日怒彈三成，如果miss咗可留意中國創新支付(8083)，昨低位行第一棍，應該仲有15%至20%水位。
有乜股應彈而未行？Dynam Japan(6889)炒味濃可一試。日本經濟復蘇勢頭未變，彈珠機收益料可平穩增長，近月受累市況高位喪插五成，可說無妄之災。近日圖表有築底之象，MACD快由熊轉牛，PE僅8倍，股息率5.4厘，屬地底泥估值。以黃金比率計，如反彈跌幅0.382倍，可見25.4元。此外，合作夥伴澳門勵駿(1680)昨蠢蠢欲動，呢對「孖公仔」有機會齊齊發圍。
魏力
http://www.facebook.com/2012jason
上一則: 何車500：東風可趁低收集 - 何車
下一則: 青心直說：最壞情況估算 - 胡孟青
異動空間 - 魏力 舊文
