阿爺出招市
2014年05月14日
美股再創新高，港股同樣錄得四連升，不過，港股上升似乎同美股關係唔係咁大，反而係因為阿爺不斷傳出有招數出台，昨日輪到內房股炒政策，個市升跌，同中央棄保邊個行業關係大啲。
內房炒阿爺出招，主要係有消息出街話央行和銀監會周一同15間銀行開會，要求積極引導房地產信貸市場健康發展，保證正常房地產融資需求，貨幣當局希望商業銀行能夠對個人住房按揭貸款合理定價，提高貸款發放和審批效率，不許停止個人購房貸款。市場覺得阿爺開始指住銀行要放貸款畀個人買樓，有利樓市，於是幾隻大型內房股率先炒上。中國海外(688) 及華潤置地(1109) 分別升4%及5%，同時成為升幅最大藍籌股。
內房炒銀行鬆放貸
前晚美股再創新高，港股昨日再升，我點解話同外圍關係唔係咁大呢？因為個市大幅高開175點，但跟住已見投資者趁機獲利，加上滬深兩市回軟壓力下，港股無力再上，恒指升勢回順，餘下大部份時間窄幅上落，只不過因為有內房等個別板塊造好，令指數錄得升幅，恒指收市升90點；國企指數收報9855點，升27點，成交金額507億元，成交轉淡，買意不強。除內房外，港府放寬「雙倍印花稅」換樓期限，續撐起一眾本地地產股，強勢股長實(001) 報133元，仲創咗一年新高價。
上個星期五•一後，基金借住黃金周賣樓放緩猛質內房股，陸羽仁認為佢哋被人咁沽法，短期唔使睇得咁淡，認為龍頭股好似隻中國海外再跌，反而可以考慮買吓。有中環茶友睇完之後話，陸Sir你使唔使咁勇呀，唔驚有人輸錢鬧你呀？茶友所講確係一個問題，所以我後來在網誌補番句叫大家量力而為。不過畀得意見，就要有自己睇法，先有參考價值。
陸羽仁覺得，中央要調整經濟結構，對不同問題要整治，但手法各有不同，好似開放利率，係改善市場的重要措施，就算對國企銀行有好大影響都要做，但做之餘阿爺又唔敢太急，因為怕銀行會頂唔順，所以內銀股跌到咁殘，阿爺又會搞吓嘢幫吓佢哋，順住呢個思維，股民對內銀唔可以有太大期望，但當佢哋跌得好急時，起碼短期就無謂再睇淡！內房情況差唔多，阿爺唔想房價升，希望樓市可以軟着陸，但樓價跌得太快，阿爺又驚對經濟有太大衝擊。
內地樓市在春節過後轉弱，發展商賣樓不太順，不過好多內房近一個月插到好甘，唔多唔少已經在股價反映咗樓市下跌的問題，如果股民係基金沽貨沽到開巷時減磅，咁有有可能變成低位沽貨囉。
長線投資講心理質素
中央調整經濟有又砌又扶，對不同類型企業有不同影響，但當個市插到咁上下時，又要等阿爺出招市。
在大插時，投資者自處方法，識得秤吓自己的投資對象，究竟跌到咁估值係貴係平？佢哋係阿爺政策定位，究竟係主力打擊、或者係好似內房咁又驚佢死、又怕佢活？確定咗自己投資對象的處境同價值，加埋考慮個人究竟係貨多或貨少(無乜貨可以勇少少)，先做決定，方向感自然好好多。
家無論香港抑或內地，都係經濟換檔期，國家同公司都唔會有高速增長，係呢個時候你去買股，就要有長線投資的心理準備，乜係長線投資的心理準備，一係買咗要預捱價，短期唔等用的錢先用嚟投資；二係落注目標要物有所值，如果你有心儀對象，應該好似追求大家閨秀咁，要用耐性慢慢感動佢，千祈唔好用一夜情策略急急腳去搞。
陸羽仁
金融High Tea 舊文
