魚樂無窮：潤泥績佳蓄勢大反彈 - 唐牛
■周龍山任主席的潤泥受惠於水泥價格上漲，表現標青，全年業績睇高一線。資料圖片
美股再創新高，帶動周一爆升嘅恒指，再高開175點，但高位明顯有壓力，埋單僅升91點。噚日焦點繼續落喺有消息嘅板塊身上︰人行要求銀行提高房地產貸款發放，擺明托市，內房股全線爆上；超人有份嘅網上支付系統Bitpay，獲維珍航空創辦人布蘭森及雅虎創辦人楊致遠注資，亦令本港支付股絕地反彈。
淡季水泥價靚仔
日推介嘅華潤水泥(1313)，同樣有好消息支持。公司剛公佈首季業績，截至3月底止，營業額按年增長13.8%至68億銀，盈利更大升69.6%至7.7億銀，主要受惠毛利率按年大升8.5個百分點至31.8%，亦較去年底嘅28.5%為高。點解毛利率咁靚仔？產品價格全線造好成為關鍵。
以集團主要基地廣東為例，每噸水泥平均售價為413.1元，按年勁升25%，亦較去年全年平均售價高兩成。整體每噸水泥平均售價為375.1元，按年升兩成，亦較去年底高17%。
唔好忘記，每年第一季乃行業傳統淡季，但潤泥表現如此標青，全年業績值得睇高一線；根據數字水泥網數據，4月底廣東水泥價每噸已升至440元，即一個月再升逾6%，強勢逼人。
睇圖表，潤泥4月起跟隨大市回落，約一個月喪插26%，大有跌過龍之嫌，如今有靚仔業績支持，強烈反彈可期，噚日已率先試衝牛熊線，一旦企穩，首個反彈目標先睇黃金比率0.5倍嘅5.54元，潛在升幅約一成。
唐牛
上一則: Follow Me：銀證追落後勢闖六元 - 高彰坡
下一則: 股場放大鏡：炒世界盃概念撈華彩 - 歐陽風
魚樂無窮 - 唐牛 舊文
