中環在線：高層大執位港龍前CEO接掌國泰公關 - 李華華
■唐偉邦(右三)同梁皚亭(左三)曾經一齊喺港龍共事，𠵱家就喺國泰唔同部門工作。
國泰航空(293)噚日公佈幾個高層職位調動，早幾日講過公關部一姐張鳳婷已經遞信，國泰就決定將港龍航空前行政總裁(CEO)、𠵱家負責國泰收益管理嘅唐偉邦(James)調做公關部阿頭。
國泰嘅見習行政人員制度都幾似喺政府做政務主任，喺一個部門做夠幾年就會被調動，每年5月就係國泰、太古系最高層討論同埋決定見習行政人員調動嘅時候。
「幫港出聲」召集人周融嘅太太張鳳婷決定離開工作27年嘅國泰，公司就調James做公關阿頭。由港龍前CEO調做公關阿頭，按職銜睇，好似好奇怪，但係其實國泰自2006年收購港龍，港龍CEO一職嘅性質，已經變成國泰其中一個地區總經理。
James喺2009年至2011年期間擔任港龍CEO，之後被調返去國泰，做收益管理總經理，𠵱家再被調去管公關部，都係一個部門調去另一個部門。
公關部阿二職位暫懸空
國泰公關部阿頭換人，阿二梁皚亭(Cecilia)亦會被調去空運部。James同Cecilia早幾年曾經一齊喺港龍共事，𠵱家雖然一齊喺國泰，不過繼續唔同部門。至於阿二呢個位邊個接，聽聞暫時懸空。
講起國泰公關阿二，曾經做過呢個位嘅程鼎一，當年都好得傳媒歡心，後來被調去澳洲，𠵱家係中國區總經理，喺今次調動，程鼎一獲升為國泰銷售及市務董事。出名識唱歌嘅港龍現任CEO楊偉添將調任台灣暨韓國地區總經理，由國泰服務CEO丘應樺接替。
李華華
mailto:LiWaWa@AppleDaily.com
上一則: 樂香園：千頌伊救唔救到達芙妮？ - 海迪
下一則: 中環在線：太古廣場酒會星光閃閃 - 李華華
中環在線 - 李華華 舊文
