趣BLOGBLOG：好股等好運好運要死等 - 股榮
發明家愛迪生講過，天才是99%的努力加上1%的運氣，不過在股票市場，努力與收穫絕對不會對稱。每日越落力炒股，㩒死股票機、睇實走勢圖，輸錢敗興而回的個案，見得太多了。套用在自己身上，炒股成功，是50%運氣加上50%的死等。
騰訊04年上市冇人知乜水
先講何謂好股。諷刺地，大家所認定的好股，其實都是馬後炮。2004年騰訊(700)3.7元招股上市，當時大把人唔知佢係乜水，只知道有ICQ，唔係乜嘢係QQ。第一次買騰訊是2008年初，大約以55元買入，經過一年時間，股價近乎原地踏步。一隻唔鬱的股，當時判定為衰股。衰股2009年中開始變好股，揸了兩年直至2011年，升穿200蚊就沽貨，沽貨賺到錢，好運及耐性的重要性一半半。
去年騰訊由200幾蚊重展升浪，一年間升至最高600幾蚊。今年多份報章及周刊訪問股東名冊上持股最多的散戶「赤柱股神」，就是由200幾蚊買起，到今年最高位分注沽貨。當大家齊露出讚賞的目光，認為他眼光獨到時，股榮只記得他的一句話，「真係好彩。」
每個人都希望能夠低買高沽，但現實世界，除了財演模擬組合發達倉，邊有可能次次俾你buy low sell high。入行時前輩教路，買股票發達，一字記之曰：忍。騰訊2009年中升穿100蚊，股榮揸了年半有八成回報，每日指定動作，是早午按股票機700數次，甚至白癡地收了市還㩒數次，每次急回總有衝動沽貨離場，最後克服心魔的辦法，是把股票提出來，放入保險箱。
統計數隻最近三年坊間認為的好股，回報動輒以倍計，但再統計對上三年及五年回報，回報可能微不足道，甚至負回報。港交所(388)2005至2008年初爆升近十倍，但2002至2005年的三年間，升幅為75%。銀娛(027)2008至2011年回報只有20%，近三年爆升8倍，有能耐揸到尾，抵你贏，但是眼光好嗎？其實運氣及耐性，缺一不可。
有網友指股榮揸住內銀，但常唱衰內銀。唱衰是應份，難道樣衰都要話佢靚，之不過，我深信總有一天會否極泰來。目前唯有等運到，鬥長命。
廣告時間：下周六(31日)本報有財經龍門陣講座，嘉賓包括胡孟青、孫柏文、沈振盈及何啟聰。有興趣讀者可留意今日B4廣告，登記報名。
股榮
本欄隔周四刊出
上一則: 觀塘重建項目新地表明入標
下一則: 曾淵滄專欄：炒細股輸錢買教訓 - 曾淵滄
趣BlogBlog - 股榮 舊文
