中環在線：
陸叔葉澍堃弄孫賀父親節
■陳永陸(左圖)及葉澍堃(右圖)都榮升做爺爺冇耐，準備大事慶祝。
■錢志健諗住周日嘅節目就係去遊水。 呢個星期可謂男人嘅世界，世界盃噚晚開鑼，呢個星期日又係父親節，大家除咗較定鬧鐘起身睇波，仲要諗定節目。
財經名人當中，股評人陳永陸(陸叔)與前經濟發展及勞工局局長葉澍堃應該幾幸福，兩人都係榮升爺爺冇耐，準備大事慶祝。
舊年底升呢做阿爺嘅陸叔笑住話，今年父親節自己應該會過得特別開心，皆因阿仔、新抱帶埋小孫女半個月前由澳洲返嚟香港，住埋同一幢大廈，加埋一直在港嘅阿女，今年可以一家人齊腳慶祝。
■黃光耀個仔喺外國讀書，今年父親節忙住賣樓，行唔開呀。 錢志健帶3歲仔去遊水
佢話已經安排好曬，一家人以前曾經喺新加坡住過一段時間，對當地菜式情有獨鍾，於是訂咗枱食咖喱蟹㗎喇。一提孫女，佢就特別雀躍，指孫女雖然只得半歲大，但已經重6至7公斤，「係肥妹仔嚟㗎」咁話。咁趣致，難怪佢一放工就返歸弄孫為樂。
葉澍堃嘅孫仔𠵱家兩個月大，佢長子葉瀚林(Hiram)好坦白咁講，以前多數只係慶祝母親節，好少慶祝父親節，𠵱家自己做咗爸爸，先至覺得應該重視埋父親節，已經約好細佬同埋父母，打算周日下午喺馬會跟爸爸食晏慶祝。葉澍堃應該飲得杯落。
至於爸爸級嘅基金經理錢志健與會德豐地產常務董事黃光耀，錢志健領養嘅兒子今年3歲，佢哋周日嘅節目就係去遊水，跟平日差唔多。黃光耀個仔喺外國讀書，佢話往年父親節一定想辦法黐實阿仔，不過今年佢忙住賣樓，行唔開呀，陰公豬。
李華華
mailto:LiWaWa@AppleDaily.com
【壹錘定音】星期一至五，早上8點開咪！
http://hammerout.hk
立即更新《蘋果動新聞》app
https://bitly.com/AppleDailyiOSApp
https://bitly.com/appledailyandroidapp
LiWaWa@AppleDaily.com
中環在線 - 李華華 舊文
