過山車 膽博膽
2014年06月13日
淡市搵嘢炒嘅現象持續，前日勁炒嘅AH大折讓股再度發威，洛陽玻璃(1108) 升近20%，造3.67元；浙江世寶(1057) 亦爆升近15%，報5.95元；民生銀行(1988) 都彈番3.4%，是表現最佳國企成份股。
炒吓國企折讓外，股仔在淡市中炒風又起，賣按摩椅豪特保健(6880) 炒上，外界仲以為炒父親節送禮俾爹哋之際，公司宣佈大股東洽售控制權，股價復牌後急升，另一隻南華金融(619) 又係話有人斟盤，股價連升幾日。
主板殼值四億
睇番豪特保健2011年上市，俾人唱到好得，可惜公司業績迅速走樣，除稅前溢利由上市前的八千幾萬，翌年急插一半得番四千幾萬，對上一個年度得番三百幾萬，股價由上市的1.58元，好快跌到得番幾毫子。以呢個盈利，喺上市買咗嘅小股東肯定有排見唔到家鄉，家大股東話賣盤，小股東有機會跳船，可以話係另一種負責任的表現啦！家主板殼淨殼價值4億，創業板殼值兩億，賣殼都益吓小股東啩。
至於南華金融炒賣盤，就好似過山車咁，幾個月前傳佢賣盤，股價由6、7仙炒上26.5仙，跟住話賣唔成，股價又插番落10.3仙，今個月又傳斟盤，股價好快爆番上20仙樓上，總之炒佢就膽博膽！
中環茶友話，股仔賣盤潮相信仲會繼續，因為內地資金用三幾億資金買個殼，喺財務上仲係好使好用，有佢嘅價值，對好多業務無乜表現嘅公司嚟講，大股東賣咗佢已經上岸，點解唔諗呢？所以呢個概念短期仲有得炒吓，但玩呢種過山車遊戲，風險當然要自負啦！
股仔炒炒吓，個市就繼續偏軟，恒生指數收23175點，跌82點；國企指數收報10431點，跌76點，世界盃前夕，成交縮減至484億元。
中央出手撐國家安全，計劃將國有資本投向國家安全，發展重要前瞻性戰略性產業、保護生態環境、支持科技進步、保障國家安全，受消息推動，軟件股表現佳。金山軟件(3888) 升3.7%，報24元；但累升唔少嘅騰訊(700) 就倒跌0.7%，造115.6元。
新加坡主權投資基金淡馬錫控股，昨委任三位猛人做新董事，當中包括港人熟悉的信和置業(083) 主席黃志祥。
另外兩位新董事包括蜆殼公司前執行總裁傅賽(Peter Voser)，以及畢馬威新加坡前管理合夥人陳育寵。黃志祥家族係新加坡最大私人地產商，但佢多年前跟隨老父來港搞地產，以勇猛買地見稱，變成咗主要轉戰香港，新加坡嘅生意反而俾佢兄弟打理，故此佢嘅經驗應該主要係本地。
新股市場熱番
淡馬錫喺中港有唔少投資，今年最大動作係閃電式斥資四百幾億元入股屈臣氏，反映佢對香港資產有興趣。
名言話：對岸嘅草梗係青綠啲，雖然有人話香港環境愈嚟愈差，又話會有移民潮，但好多其他地方嘅人，就好想嚟香港插吓旗，今次委任香港大地產商入局，會唔會代表新加坡主權基金，想趁本港地價下跌，增加在港投資呢？
新股市場近日活躍番小小，再生能源綠色動力(1330) 中午截止公開發售，市場消息透露，初步錄得逾50倍超額認購，因此將啟動回撥機制，令公開發售比重由10%增至逾40%。
市場消息透露，紙板紙製造商長港敦信實業(2229) 擬發行2.482億股股份，招股價1.4元，集資3.475億元，將於下周一(16日)起公開招股。
陸羽仁
金融High Tea 舊文
