中環在線：
新股珂萊蒂爾英文名扮Dior？
■金明(中)話鍾意Koradior個名有女人味。
新股大混戰睇到散戶眼花，要吸引眼球可以搵模特兒或者藝人撐場，亦都可以用名字博出位，內地女裝品牌珂萊蒂爾(3709)就兩樣都有齊。中文名蹺口嘅珂萊蒂爾，英文名Koradior同樣特別，驟眼睇以為係國際大品牌Dior個friend，但根據招股書披露，Dior曾經喺珂萊蒂爾註冊呢個商標時提出反對，雙方原來係敵人。
■模特兒穿上珂萊蒂爾出品嘅服飾，係咪好有內涵同女性化呢。 商標獲內地認可
人有相似，物有相同，公司名都好易撞，好似長和實業(009)就好易俾人誤認做長和系嘅朋友；電訊首科(8145)又好易令人聯想到電訊盈科(008)。
但撞名撞到俾大品牌反對又點收科呢？珂萊蒂爾噚日推介會同記者會都搵嚟一班模特兒撐場，董事長金明講到Dior提出反對，就強調呢個名經內地商標管理局認可，喺內地營運完全冇問題，除非衝出國際，而事實上佢哋都冇呢個打算喎！
好多上市公司將英文名音譯中文名，搞到唔少讀起上嚟好蹺口，好似克莉絲汀(1210)譯自Christine、依利安達(1151)譯自Elec& Eltek。
根據招股書，珂萊蒂爾係金明2007年用「積蓄」向父母以過千萬人仔買番嚟。金明話，公司名係喺一堆集體創作入面揀出嚟，冇特別意思，但有特別內涵，皆因當年佢覺得中國女裝市場太多女強人感覺嘅服飾，作為傳統男人，佢覺得應該要多啲女性化嘅設計，所以揀咗珂萊蒂爾，貪個名有女人味，又有時尚年輕感喎，唔知大家又有冇呢種feel呢？
李華華
mailto:LiWaWa@AppleDaily.com
識睇一定睇蘋果嘅足動世盃：
http://worldcup2014.appledaily.com/
LiWaWa@AppleDaily.com
中環在線 - 李華華 舊文
