智取大市：長線投資四大心法
■莫祖權任執行董事的瑞聲科技公佈業績後爆升，到最近已經升夠四成。資料圖片
如果要數今年3月尾去到而家，唔夠三個月時間，股價表現最強嘅股份包括大折讓H股、蘋果概念嘅手機設備股、細價殼股等等，藍籌股就有本地地產股，如果唔係買咗呢啲股，其餘就冇乜鑊氣，股份跟住個市走，仲要有啲股逆市輸錢。
成交少，可以炒上嘅股份類型就收到好窄。馬後炮地分析上述強勢股，大折讓H股波幅大，睇日線圖好似日日陽燭，其實細心睇洛陽玻璃(1108)，中間可以急升近一成，然後倒跌，再拗腰全日升超過一成，chok到頭暈。至於瑞聲科技(2018)公佈業績後爆升夠正路，如果喺公佈第一日買入，持有到最近先沽出，就可以賺四成。不過，睇好瑞聲就要克服3、4月市場憂慮蘋果喺中國生意疲弱嘅負面睇法，要捱得過大市4月調整，仲要中線持有修成正果，一樣唔易。
中線投資難，長線投資就更難，你先要避過無數次大市調整，甚至面對三幾年總出現一次嘅大跌市，又要經歷市場無數次質疑，你唔係合埋眼就好難做到。就算你做到合埋眼，卻選中隻內銀股，就令你迷失六年。
要做到長線投資，又要有信心買啱股贏大錢，梗係難上加難，但係，根據晉佳嘅觀察，長線投資者一定要注意四大心法，做到呢四招，或許已成功咗一半。
第一招，盡量揀冇乜人講、冇乜人揸嘅股票。幾年前最多人講嘅內銀股、內險股，就已經係一個活生生嘅齊齊坐艇例子。相反同為金融股嘅友邦(1299)，較少散戶有貨，2010年上市到而家都升一倍，表現好過內銀、滙控(005)多多聲。
分注向上溝勝一注獨贏
第二招，揀有瑕疵嘅股票。須知道價格係反映一切，如果你睇到一隻股完美無瑕，只有兩個可能性：第一，就係隻股已經天價咁高，盡反映利好因素；第二，就係隻股有你留意唔到嘅負面因素。呢兩個可能性之下，你買入隻「完美」股，一定凶多吉少。相反，隻股如果有明顯缺點，未來反而有修正機會，股價先有上升空間。
第三招，分注向上溝。一次過大注瞓身做長線投資，一旦估錯，好容易輸大錢。為避免呢種情況，分三注買入，第一注買入輸錢都冇咁肉赤，如果第二注向上突破時先吸納，已經先有賬面利潤，自然勝算較大，亦可確認自己睇法正確。與此同時，止蝕可以向上移，輸錢機會下降。
第四招，尋找你的「LuLu」。晉佳相信，每個群組裡面，都會有燈神嘅存在。當你發現一隻長線best buy，你同「LuLu」講完，佢都冇興趣，咁你先放心買吧。
晉佳
本欄逢周三刊登
識睇一定睇蘋果嘅足動世盃：
http://worldcup2014.appledaily.com/
晉佳
~TITLE_S~智取大市 - 晉佳 2014年6月18日 舊文
