中環在線：羅康瑞揸旗機管局高層心慌
當日變臉突反對搬車廠
■羅康瑞曾自爆，搬車廠的建議原先獲支持，後來卻有人轉軚反對。
■據聞，去年討論搬車廠，機場運行執行總監吳自淇、就快拜拜嘅行政總裁許漢忠都在場。 政府最近宣佈由「梁粉」羅康瑞做住一年機管局主席，接替原本續任一年又忽然話唔做嘅張建東，唔少機管局中人都大表驚訝，不過最驚嘅，應該係舊年底「跣」咗羅康瑞一劑，有高層本來支持羅康瑞搬走地底車廠發展商業中心，轉頭又大力反對嘅幾位高層。
羅康瑞曾經自爆，舊年10月23號跟顧問同機管局管理層開會，就機場北商業用地(現為高球場)嘅發展進行討論，呢幅地原本計劃喺地底興建無人駕駛列車車廠，配合第三條跑道建設，羅康瑞就認為，搬走車廠，將呢幅地單純發展為商業中心令幅地更值錢。
據聞，當日呢個會，建築工程執行總監蔡新榮、機場運行執行總監吳自淇、就快拜拜嘅行政總裁許漢忠都在場，有人積極贊同羅康瑞嘅睇法，話個車廠隨時搬走都得。
既然有人咁講，羅康瑞以為十拿九穩，咪叫管理層做多份報告，等到11月1號開會時再討論。
點知政府喺10月25號宣佈張建東續任主席一年，任期至2015年5月，管理層眼見形勢有變，以為羅康瑞未必可以接替張建東做主席，即刻變臉。羅康瑞自己都話，到咗11月1號開會當日，冇人提供其他資料，支持者唔見曬。
■羅康瑞去年辭職信內容 I do have reservations on some of AA's senior management, on their attitude and competencies.
(我對部份機管局高層的態度與能力有保留)
去年辭職信透露端倪
佢之後嬲得滯，高調辭任董事局旗下基建籌劃小組主席一職，佢仲喺辭職信度寫明，對部份機管局高層嘅態度與能力好有保留㖭。
不過呢個星期開始，羅康瑞接替張建東做機管局主席，成件事咁戲劇性，據聞好多機管局中人都準備定花生睇戲，睇嚇羅康瑞呢位官仔骨骨嘅「上海姑爺」有乜行動。
李華華
mailto:LiWaWa@AppleDaily.com
【壹錘定音】星期一至五，早上8點開咪！
http://hk.apple.nextmedia.com/livestream/channel/lishow
立即更新Android《蘋果動新聞》app
https://bitly.com/appledailyandroidapp
LiWaWa@AppleDaily.com
中環在線 - 李華華 舊文
