爆上之後
2014年06月06日
港股踏入6月，雖然未出現六絕現象，但指數就呆呆哋，搵嘢炒嘅遊戲就繼續，呢次就輪到地產股。恒基地產(012) 主席李兆基開金口，話?家買地產股好過買樓，我在網誌拆局，上次李四叔咁講，曾經刺激恒基股價爆上，不過跟得唔快嘅散戶，好多就變成摸高追貨，蟹咗。有中環茶友追問，陸Sir，近排好多大行都出嚟唱好地產股，你睇會唔會係一次大合奏呢？
地產股淡市開花
茶友咁問，係因為繼花旗唱好本地地產股後，摩根大通接力轉軚唱好，聲稱現時是合適時間加碼買地產股，同時調高多隻地產股評級及目標價。佢嘅意見係，本地地產股基本因素漸見改善，隨着二手市場復甦，摩通相信地產股估值將可擺脫艱難時期。
最服係摩通竟然話，賣地價差唔係壞消息，認為新界地價跌對地產股有利，加上住宅需求續強，相信地產股有望上升。報告調高了新世界(017) 、恒地、信置(083) 及嘉里(683) 的目標價，同時維持新地(016) 及長實(001) 為行業首選。
喺大行點評下，恒生指數昨收報23109點，跌42點，但地產股就喺淡市搶晒鏡，首四大升幅藍籌更全是本地地產股。
大行理論多多，四叔又話地產股淨係計拆骨價都抵買。陸羽仁睇法係，佢哋呢浸升法，主要係資金搵嘢炒，趁住呢排新盤開售，好似出現咗個小陽春，市場氣氛好番啲，於是就炒吓資產概念。
坦白講句，若然話資產折讓大就抵買，咁好多內房股都比資產有明顯折讓，唔講其他，同樣係龍頭的中海外(688) ，折讓都有成30%、40%啦，不過暫時見唔到大行炒佢囉。
要留意嘅係，地產股雖然起鬨，近排表現領先嘅長實昨日就無跟大隊上升，反而跌咗1%，唔排除佢因為升得快，故此率先回吐。
長實?家有大盤開售，初步收成3000票，就算當中或者有「發水」成份，相信到開售時候，都好大機會可以大批去貨，值得炒緊地產股的投資者留意，如果佢持續調整，炒地產股者可能就要醒定啲嘞。
本港地產股外，近日個別本港證券股走勢都唔錯，好似隻新鴻基公司(086) 本周陰陰哋升，昨收報5.72元，接近半年新高。集團日前表示，正為滬港通做準備。
另外，上月渣打(2888) 放售安信信貸的交易將於本月揭盅，聽聞安信吸引多名買家垂青，市場估計，安信估值介乎39至54億元，也相當於市帳率兩至三倍之高，與本地銀行看齊。新鴻基公司有持股的亞洲聯合財務，亦曾傳出安排分拆上市，早前表示已經委聘摩根大通、摩根士丹利及瑞士銀行，負責分拆，估值約30億美元(約234億港元)。
歐減息博炒上
一如市場預期，歐洲央行昨日終於宣佈減息，基準利率減至0.15厘新低，存款機制利率更加係降至負數，成為全球首個實施負利率的主要央行。該行同時又宣佈一系列刺激信貸嘅政策，包括重啟4000億歐羅(4.215萬億港元)長期再融資操作(LTRO)，並已準備好量化寬鬆買債，睇嚟炒家又再蠢蠢欲動。
陸羽仁
金融High Tea 舊文
