智取大市：QE改變緊香港命運
■因為QE大行其道，經濟體系之間嘅倚賴性已經減低，各國自掃門前雪。路透社
上半年投資市場令你振奮定係難受？對於晉佳嚟講係後者居多(其實晉佳多數時間都係難受多過滿意)，雖然唔係要輸錢，但因為上半年大部份時間步步為營，錯失唔少機會，短炒亦因為對後市信心不足，而失諸交臂。更難受嘅係，下半年暫時睇唔到有轉機，恐怕捱打居多，未有低撈機會之前，晉佳決定小出手為妙，只剩長線持倉。
大家有冇發覺，近期大部份日子，跌股數目多過升股。指數股仲喺中場猜波，拉勻指數唔點升跌，中間又chok到暈，但與此同時，非指數股喺後面已經輸緊波。至於喺外面嘅世界，而家東南亞股市不知幾咁風光，標普500指數亦喺高位，望嚇自己，就發覺自己屬於行緊衰運嘅少數人。近年兩極化情況越嚟越普遍，前幾年美股勁、中股衰，去到今年東南亞股市勁、中股繼續衰。投資市場生態改變咗，都係同資金氾濫扯上關係。
回想起10年前左右，「全球一體化」呢個字，大家成日掛喺口邊，所講嘅係，唔同經濟體系之間，貿易同金融層面越嚟越緊密，環球股市亦齊上齊落，一有乜風吹草動，歐美港日呢類市場都不能倖免一齊跌，甚至內地股市都會燒著後欄。不過，呢種一體化現象已經out曬，講到尾係因為主要經濟體不停碌卡利用QE印銀紙，令到全世界錢太多，每次負面事件，一係使錢搞掂，與此同時將連鎖效應減到最低。港股近排每次急chok，環球股市都懶得畀反應。
各國自掃門前雪
呢種環境，係就係容易防止系統性危機發生，環球股市難有重創風險，但係都帶來龐大嘅禍害。第一，每個國家恃住自己夠錢使，就會減低經濟體系之間嘅倚賴性，大家永遠睇住自己盤數做嘢，例如美國QE，就要搵其他新興市場通脹幫佢埋單，經濟政策並非顧及夥伴去做，拉勻大家係worse off。第二，嚇嚇用錢解決問題，令各國唔敢進行大膽經濟改革，拖慢解決結構性問題進度，長遠經濟只會越嚟越衰。第三，失去咗「全球一體化」，就開始失去埋秩序，例如中國做乜，對美國冇乜後果，仲出聲嚟做乜。久而久之，每個國家建立自己規矩做事，變得越嚟越冇秩序。大家利益關係分得太開，各家自掃門前雪嘅態度，感染到去政治範疇，烏克蘭事件、中央對港政治問題，外界都闊佬懶理，所以香港人其實都係受害者。
見報之日，七一遊行已經結束，呢一日唔知發生過乜嘢事，但之前發生吳先生嘅事件，反映政府挑戰埋立法制度，咁司法制度keep得住都冇用，呢嚇真係睇到晉佳心灰意冷，呢種心酸，股票贏幾多錢都唔會補得番。
晉佳
本欄逢周三刊登
晉佳
智取大市 - 晉佳 舊文
