魚樂無窮：炒股也需cooling break
■踢波固然需要休息，喺股市搵食同樣要懂得固本培元。資料圖片
今年世界盃出現唔少尾市發力場面，最經典莫過於荷蘭喺完場前幾分鐘連入兩球，戲劇性反勝有Sam哥做門神嘅墨西哥。有人話洛賓經常喺禁區插水，最終呃到個12碼返嚟，完成逆轉性劇本。唐牛就覺得，今屆因為酷熱潮濕天氣應運而生嘅cooling break，先係橙衣兵團贏波關鍵。
財不入急門
呢場波曾經有兩次cooling break，每次歷時三分鐘，旨在讓球員飲飲水、唞唞氣，避免因極端天氣影響演出，從球迷角度出發，比賽可觀性亦大大提高。雖然只係短短幾分鐘，但荷蘭球員休息後明顯回復生氣，最終連下兩城，反敗為勝。
大熱天時踢波固然需要休息，喺波譎雲詭嘅股市搵食，同樣要懂得固本培元之道。回顧上半年成績，頭兩個月食正新經濟板塊大牛市，即使恒指微跌收場，但投資組合都做到正回報，不過不失。但同唔少戰友傾開，一致認同現時市況係前所未見──市場深度太低。好似期指市場咁，在毫無先兆下，可接連出現急瀉情況，承接力弱得可憐，反映人心虛怯，勢色不對就先沽為敬。股票就經常假突破，意味炒友只求賺餐晏，冇信心揸貨過夜，導致升勢極其短癮。
如此市況，炒十次輸十次不足為奇，最好嘅應對就係嚟個cooling break──暫時離開市場，停一停想一想，始終財不入急門，越想追就會賭得大，最後只會輸得越甘，變數更多嘅下半場開波喇，各位戰友共勉之！
唐牛
https://www.facebook.com/tongcow88
唐牛
魚樂無窮 - 唐牛 舊文
