異動空間：樓市見頂點樣睇
半年過去你的炒股成績如何？首季仍賺20%的魏力第二季努力戒手痕，埋單仍要蝕5%，表現相當失望。市場起跌十分正常，只要捉到升跌韻律，睇清投資主題，要搵食並不困難。奈何新經濟股散曬後接力板塊欠奉，勉強要揀只有汽車股較省鏡，其他不外乎窄幅上落，毫無趨勢可言。睇圖炒更是一街地雷，股價破位正路係衝，但大戶逆向思維，破位係派貨，跌穿支持位就收集再炒上。魏力硬食幾鑊終於學乖，但下季可能又轉新花款，學費隨時白交。
既然個腦同對手點都唔夠大戶快，惟有以慢打快，買幾隻坐長途機算，包括富智康(2038)、安踏(2020)、TCL多媒體(1070)及億和(838)，集中睇幾隻可專注跟進其消息及報告，唔使左一巴右一巴，暈陀陀冇曬方向。
樓市減辣，地產商賣樓收益大增，股價走勢強勁，美聯(1200)低位亦彈兩成，中原指數更逼近新高，似乎真係無得跌，網上更見不少留言指，SSD嚇窒賣家，無沽盤又何來下跌？市場亢奮，唔少人受氣氛影響追貨，不顧風險，細價樓呎價屢創新高，股票角度睇似係升浪尾聲，如地產股見頂急插，隨時就係樓市見頂之時。
魏力
http://www.facebook.com/2012jason
魏力
異動空間 - 魏力 舊文
