魚樂無窮：山東墨龍H股大平賣
■張雪三任副董事長的山東墨龍首季賺445萬人仔，成功扭虧為盈。資料圖片
呢期非股市新聞非常精采──乜太爆seed喪鬧學者，令人倒抽一口涼氣；荷蘭加時完場前換入神龍，成為晉級英雄；曹sir大談政治經，字字珠璣；沙田第一城細單位突破400萬銀，窮人恩物起錶價又要提高。
今日從圖表出發，推介石油鑽採設備股山東墨龍(568)。創出52周新高，兼有成交配合，難得難得。基本因素亦唔曳，首季賺445萬人仔，成功扭轉去年全年虧損局面，在憧憬阿爺今年加快頁岩氣發展下，業績值得看高一線。
山東墨龍另一賣點在於H股大平賣，A股昨日收市價9.14元人民幣，折合港紙11.5元，H股收報4.08元，折讓幅度達65%，大得不合理，只要差價輕微收窄，已經好和味。
新股百本醫護概念足
同場加映今日配售上市嘅百本醫護(8216)，公司主要提供醫護中介服務，上市公司計絕無僅有，概念贏曬。根據市場統計，百本屬行業龍頭，最新市佔率達48.9%，拋離第二位嘅接近20個百分點。今次以上限0.5元定價，但市值其實僅2億銀，當中超過四分之一更屬現金，屬細細粒現金牛，如果高開唔多，不妨設止蝕位炒作，話唔定有意外收穫。
世界盃進入白熱化階段，今晚四強首戰上演2002年決賽翻版──巴西對德國，前者有皇牌尼馬因傷缺陣，加上後衞兼隊長堤亞高施華停賽，卻換來平手高水盤(1.97倍)嘅，一於撐有主場之利嘅巴西！
唐牛
https://www.facebook.com/tongcow88
唐牛
魚樂無窮 - 唐牛 舊文
