金手指：點解2016先買樓
■由於香港內部政治極不明朗，目前絕非買樓之時。
盛智文話：「Hong Kong is stuck(香港卡住了)！」咁卡住啲乜？施永青噚日分析話係對整個建制嘅不滿。選特首、立法會嘅方法當然係，不過另一觸發點，必定係司法制度。唔好誤會！唔係講緊啲法官，而係佢哋要跟住判嘅基本法。呢個point喺舊年終審庭對居港毋須七年就可攞綜援一案已表露無遺。
好啦，噚日立法會搞咗場諮詢會講呢單嘢，我有去。聽其他講者，都係右膠話濫用綜援，左膠喊歧視新移民。
香港政治極不明朗
到我時我話：「主席，墮胎喺全世界都唔係選舉大議題，唯獨美國係。點解(去到呢度，會議主席馮檢基提我離題，不過我繼續)？因全世界對墮胎政策制定，都係立法機關經激烈辯論後，達成共識，唯獨喺美國靠一次司法覆核去定。立法機關選70個代表，連行政長官都689票，法官冇人選出來，民意基礎薄弱，一旦變相制定政策，社會一定撕裂，情況同推翻七年居港先有綜援一樣。」
我繼續說：「問題係，七年要求已被證明係社會共識。共識到點？候選人百花齊放嘅立法會選舉中，喺2008、2012兩屆都冇任何參選政綱話要推翻，點知一個跟基本法嘅裁決就冇咗。所以我有以下建議，我知會路途艱辛同長久，不過政府有冇考慮啟動程序，修改有關嘅基本法條款，等我哋可以攞番福利政策制定嘅自主權呢？」噚日在場嘅官員膊頭唔夠花，第一輪回應冇覆，馮檢基追問下，結果都係挲咗去。
不過你想香港能unstuck，想幫中港矛盾降溫，就諗諗用呢個有社會共識嘅議題，跟程序啟動改基本法啦。
噚日見香港人申請移民人數升兩成，我諗除非有移民公司上市，唯一可做嘅投資部署，就係賣樓減磅。上周我訪問美聯(1200)第二大股東Apex嘅話事人，佢話2016先係買住宅樓之時，因由現在到那時香港內部政治都不明朗，今周我明啦。
孫柏文
獨立股評人
http://facebook.com/shuen
本欄逢周二刊出
金手指 - 孫柏文 舊文
