抽水機開動
2014年09月05日
港股突破兩萬五千點後，開始有公司出嚟抽水，兩隻二、三線股越秀地產(123) 同耀才證劵(1428) 同時宣佈供股集資。內房先有碧桂園(2007) 宣佈供股，跟住輪到越秀，反映內地房貸仍未見放鬆，內地房產商續尋求方法去改善財務狀況。
越秀今次係按每100股供33股方式供股，每股供股價為1.25元，較該股停牌前報1.67元，折讓約25%，籌38億元。董事會認為，透過供股集資，為其未來擴展計劃提供資金，符合該公司及股東整體最佳利益。與借貸或發債不同，供股不會產生利息負擔或額外債務，是公司籌集長期資金的優先選擇。
內房再傳供股消息
越秀地產透過注資入旗下房託套現一筆，財政壓力唔大，家再集資，估計係用嚟買地，市場對供股反應未算太反感，股價挫後回穩，收造1.65元，跌1.2%；同樣計劃供股的耀才證券則挫3.62%，收報1.33元。
內地多個城市近期先後放鬆或取消限購令，不過暫時對市況影響未係好明顯。標普董事總經理兼亞太區企業評級分析經理李國宜指，限購鬆綁雖然對需求有一定幫助，但供求失衡才是主要問題。
佢估計，大量供應將於未來6至12個月內出現，政府的措施能否解決庫存的問題，要視乎政策力度及市場需時多久去消化。不過，金九銀十的傳統旺季將至，加上限購放寬，相信下半年整體銷售會較上半年為佳。鑑於預期房價跌5%，料銷售額較去年同樣跌5%。
究竟內房消化要幾耐，其實好受市場氣氛影響，一旦轉勢可能又會好快熱番，畢竟內地家投資渠道始終唔係咁多。但喺市道未熱番之前，相信內房抽水個案陸續有來，落注前真係要做定心理準備，同埋避免買太高負債的內房。
雖然有公司開動抽水機，但港股整體氣氛仲算OK，內地滬指五連捷，上證指數升穿兩千三點關口，恒生指數收市雖然微跌20點，但國企指數仍能保持升勢，大市交投亦有八百多億元。
太陽能股走勢強
內地上證指數連升五日，內險股持續升勢。國壽(2628) 跑贏一眾藍籌，漲0.65元或2.82%，造23.7元。光伏股跑贏大市，保利協鑫(3800) 揚5%，造2.92元；興業太陽能(750) 飆6.25%，報13.6元。今年光伏板塊市場環境好轉，係內地熱炒股之一，佢哋昨日升得咁急可能會先回一回，如果個市繼續去，呢類股份炒作空間應該比較大。
個市家最當炒都係滬港通概念。港交所(388) 公佈，已與上交所及中國結算訂立協議，以建立滬港通定單路由安排及相關機制。
對於滬港通嘅威力，瑞銀證券中國證券研究部副主管陳李就認為，短期內市場對滬港通的預期或過高，尤其安排在技術層面包括稅收制度、匯率結算風險等，仍存在一些限制。
佢又講到，滬港通推出後，加上合格境外機構投資者(QFII)及人民幣境外合格機構投資者(RQFII)，境外投資者理論上持有的股票市值達9000億元。
當外國投資者持有的股票增加，相信A股很快會被納入MSCI指數。
現時A股市場主要由散戶主導，佢相信日後會形成分化格局。屆時因海外機構投資者偏好投資藍籌股，對藍籌會有更大定價權，細價股仍維持由散戶主導。由於現時內地融資成本下降、外來資金增加都有利內地股市，預計到年底滬深股市會有5%的增幅。
陸羽仁
金融High Tea 舊文
