低相關性
2014/10/24 上午 09:31:40
網誌分類: 經濟
歐洲經濟數字回暖，歐元區10月份製造業採購經理人指數(PMI)意外地上升至50.7點，創出兩個月高位，而市場預期原本製造業會萎縮，低過50點，結果比預期好。與此同時，德國製造業採購經理人指數亦重上50點以上的水平，服務業指數則觸及4個月高位。歐洲股市造好，其中德國及法國股市升1.2%及1.3%。
美國最近一周首次申領失業救濟人數增加1.7萬人至28.3萬人，同市場期差唔多，而四周移動平均數降至28.1萬人，係2000年5月份以來最低水平。反映經濟狀況好轉，失業情況繼續改善。另外，巨企3M及卡特彼勒(Caterpillar)昨日公布季度業績，3M盈利好過預期，但營收略差過預期，而卡特彼勒盈利及營收到好過預期。3M及卡特彼勒昨日勁升接近半成，反映市場對兩份成績表都滿意收貨。
外圍唔錯，內部經濟數據OK，美企業績可以，美股昨日反彈，彈力亦不弱，杜指一度勁升300點，後來傳出有醫生染伊波拉，大市回軟，但杜指都只係回番80點，收市仍漲217點，收報16678點，升幅1.3%；標普500指數漲24點至1951點，漲幅1.2%；納指跑贏大市，升70點至4453點，漲幅1.6%。
歐洲製造業意外地未跌落萎縮區域，令投資者有點振奮，股市因而造好。而好過預期的經濟數據亦帶俾歐洲央行(ECB)一些寬慰，不過值得留意的是通縮大局未9變，10月綜合産出價格指數從9月的48.5降至47.1，係2010年2月以來最低，已經連續第31個月下調産品價格，而且降速更係近5年來最快，令人憂慮歐元區的通縮，愈來愈嚴重。更嚴重嘅問題係以歐元區領導人過往的做事作風，見到經濟數據有些起色，就會放慢手腳，唔係死到臨頭，都唔會有動作。
內地股市同美股近期總係有相反路線，加上佔中不退，搞到港股忽上忽下，好難估也。昨日，《經濟學人》指出上個月全球股市暴跌，其中歐美日股市暴跌了5至9%，而中國A股卻風平浪靜。《經濟學人》認為中國股市有一個「低相關性特質」，即係話世界其他地區的股市對中國的影響很小，中國股市也極少影響全球股市。亦由於這個特質，已成為好多大戶已經將中國A股視為對沖其他市場風險的選擇。
《經濟學人》話過去十年，上證綜指與美國標普500指數相關性為弱正相關：0.37，雖然兩者走勢方向相同，但關聯很弱。例如標普500指數與泛歐績優300指數的平均相關性就達到了0.84，顯示兩指數基本上同步而行。
《經濟學人》解釋，中國股市之所以這樣「特立獨行」，原因在於中國有資本管制。每當全球風險偏好上升時，投資者湧入各地股市，但入唔到中國，外國人唔可以直接買A股，令中國市場冇咁受外圍扯高影響。當然，資本管控唔係100%做得到，例如熱錢在一定程度上能夠推高人民幣匯價，不過，離完全可以互相影響仍有一段好長的日子。據瑞銀資料顯示，分配給境外機構的投資配額不到中國股市總市值3%。即使與滬市最相似的港股，有很多中國公司同時在香港和內地上市。即使只觀察AH股嘅聯繫，亦出乎意料地低，最近五年兩者相關性只有0.63。
所以對於尋求分散風險的投資者來说，中國的低相關性變成一個賣點。不過，從另一個角度睇，過去5年中國股市表現與外圍唔同，主要仲係落後大市。聰明的做法可能係：如果世界其他地區市場開始下跌時，避險中國股市，A股可能逆向上漲，或者至少跌幅較細。但其他股市開動時，就要離開A股，因為佢未必跟得上。
陸羽仁
回應(6) 我想回應
陸羽仁 BLOG 舊文
