買中國
2014/11/27 09:07:45
網誌分類: 經濟
美股臨收市抽高，反敗為勝，杜指及標普再創歷史收市新高。杜指漲13點，收報17828點；標普500指數升6點至2073點；納指升29點，收報4787點。
美國昨日有唔少經濟數據出爐，但由就業市場、消費者信心指數、消費者開支增長、成屋簽約量以至芝加哥採購經理人指數都較上月不濟，且差過市場預期，幾乎項項都唔係幾靚仔。
不過大市表現卻異常硬淨，雖然腳軟軟，但又跌唔落去，全日在微軟狀態橫行，臨尾仲可以發力，反敗為勝收場，再創歷史收市新高。美國時間今晚係感恩節，標誌著購物旺季開始。美國今年無輪係樓價、股市都表現唔錯，標普500指數今年就累漲了11.8%，再加上源價格跌得好勁，令到美國人心理以至口袋內多咗好多錢。市場普相信今年的消費市道會好旺，大市仲有上升空間。
市場投資氣氛樂觀，從股票恐懼指標VIX指數跌到落去11與12之間的超低水平，可見一斑。根據彭博社最新統計，大行普遍認為美股明年仍會持續創高，其中瑞銀、花旗及野村都估計S&P500指數明年上看2200點，距離現在水平，仍有超過6%的上升空間。
有分析認為，美國經濟復甦步伐雖然緩慢，時好時壞，但仍然遠好過歐洲、中國及日本的經濟，令到投資者在無得選擇的情況下，持續睇好美元及美元資產的表現。美股經過呢幾年的急升，但分析預期美國企業每股盈餘獲利仍有成長空間，企業又會回購股票提升股東權益，股市回報仍然好過國債。
有分析指標普500指數目前的市盈率約為16倍，雖然已經接近歷史平均水平，但美國許多產業仍相當有競爭性，特別是在資訊科技或是生技醫療，產業仍有前景，市盈率偏高，但仍不乏投資者追捧。
IG首席市場策略師維斯頓(Chris Weston)指出，比較今年10月中，現時有88%的公司股價已經高過50日移動平均綫，當時只有13%，不過，仍有20%的公司股價處於200日移動平均綫之下，反映大市仍未去到建議「拋售」的狀態。事實上，目前基金機構唔敢睇得咁淡，持有的標普500指數期貨空倉位已經下降到今年第二低水平。
美股高踞不下，阿爺股市在減息後三連升，特別係後者對港股有支持作用，加上好多新股上市，暫時個市都係在高位炒炒吓。
另外有個報道幾有趣，話對沖基金今年最佳投資係買….印度。據對沖基金行業回報追縱機構HFR的資料，今年至10月投資印度為主的基金平均有41.9%回報，因為市場對印度新總理莫迪的經濟改革有信心，令今年投資印度股市回報大增。
對沖基金投資的市場最差是俄羅斯，今年至10月平均輸12%，烏克蘭事件、盧布大跌、油價低落，令俄羅斯股市乏善可陳。拉丁美洲基金同期跌3.5%，主要受貨幣下跌如巴西幣大跌影響回報。中國回報亦麻麻地，至10月回報只有2.7%(計到11月可能會好啲)。所以投資新興市場不再是全買或全不買，今年投印度和中東得，投俄羅斯、拉美、中國唔得。
按我睇基金走勢的經驗，今年得的，明年未必得，反之亦然。明年地區投資，我睇好中國，我估中國會跑贏印度。又睇睇係唔係。
陸羽仁
回應(3) 我想回應
陸羽仁 BLOG 舊文
