壽股唔壽
2014年11月27日
油價續軟，三桶油腳軟軟，同油價有關的和黃(013) 都唔係咁有力，至於航空股就真係靚仔。上個星期內地失驚無神減息，凡事都講政治者就話，呢個會唔會係內地暗挺俄羅斯的招數呢？因為油價急跌，搞到賣油搵食的俄國強人普京都好唔掂，中俄喺戰略上聯手抗美，北京咪喺危急關頭減息，立即搞到全球商品價格彈返上去，咁就可以救救普京囉。
內地A股有牛味
陸羽仁從來相信，油價充滿政治考慮，但亦覺得內地做嘢唔會一味只睇國際政治。從內地經濟表現睇，佢真係有需要谷一谷，你話佢有幫俄國的考慮，都係好次要啦。在國際油組(OPEC)，包括俄羅斯和沙地等產油大國開預會傾減產，俄國竟然反對減產。雖然油價在100美元以下俄羅斯都開始唔掂，家現價73美金水平更令它周身蟻，但已經跌到咁，佢情願油價深插，一來跌得快彈得快，二來油價深插會夾死美國好多油企，普京好似想和美國油公司攬住一齊死。老外估計油價要跌到60美元，大家要有油價再跌有心理準備。
油價跌，三桶油被人質低，中石化(386) 昨彈番少少，但呢排都幾差，按理佢係原油用家，低油價對佢無乜壞處，佢都跌埋一份就有少少解唔通，呢樣嘢反而令我懷疑係咪中石化入咗中紀委最新一批巡查名單有關。央視跟住仲播埋中石化董事長傅成玉出席巡查組會議解話的片斷，如果我係中石化股東，睇到一定冒汗。
中紀委展開新一輪巡視國有企業，對政治敏感者當然金睛火眼睇實，咁對股價自然係有無形影響，醒目股民可以密切留意過關情況，睇住係需要走貨，定係等佢跌深啲時，睇吓有冇撈貨機會。
滬港通啟動雖然有點雷聲大、雨點少，但就對內地股市氣氛有明顯幫助，A股好，受惠最簡單方法唔係做滬股通，係好似陸羽仁早前講買內險股，個市借住上海版保險「國十條」登場，內險股繼續有追捧，搞到連H股有溢價的國壽(2628) 都一扭弱勢，變身為升幅最大藍籌，漲1.8元或大升7.2%，報26.8元，單是國壽已為恒指貢獻41點升幅；中國財險(2328) 最高見15.2元，創歷史新高，收報15.12元，升咗4%；平保(2318) 升3.6%，新華保險(1336) 仲靚仔，反彈8.5%，造35.1元，跑贏一眾國企指數成份股。
內險股呢舖好掂檔啦，除咗話上海版保險「國十條」公佈，提出要把上海發展成國際保險中心，還要多得A股強勁。上證指數終於升穿咗2600點，創三年來新高，收報2604點，漲36點。深成指收報8763點，漲70點。
喺上證指數連升五日下，終於刺激到港股於期指結算前夕突破，恒生指數午後發力，曾飆逾三百點，最終上破100天線(24012點)收市，收報24111點，升268點；國企指數收報11051點，一樣升268點，升幅自然比恒指大得多啦，成交金額876億元。
中廣核掀大股上市效應
港股回升一個理由係受內地牛氣牽引，另一個原因，可能同「打新」氣氛有關。中環茶友話，港交所(388) 北風圈食番鋪尾胡，中廣核(1816) 展開招股，集資二百幾億，有大股上市，包銷商理應維持秩序，所以如果外圍無乜大鑊爆，呢段時間應該係安全期，睇淡大市的股民，如果想追沽都要考慮埋呢個因素！
中廣核呢次招股，當中5%於本港作公開發售，招股價範圍介乎2.43至2.78元，集資淨額最多達239.25億元；每手1000股，入場費為2808.1元，今日(27日)開始至12月2日接受認購，並於12月10日掛牌。有市場消息指，其國際配售已有7倍超額；公開發售方面，亦獲得有約61億元孖展預訂，相當於公開發售超購近4倍，認呢股相當大路，只要唔借錢去認，都可以搵餐茶啩。
陸羽仁
金融High Tea 舊文
